P圖剋星 Adobe推面部偵測軟件還原P圖
早幾日一名20歲擁有逾400萬名微博粉絲嘅中國知名網紅韓安冉,與網紅老公「小豬」補辦婚禮,邀請大批網紅朋友出席其單身派對及婚禮,點知一眾網民睇到直播表示好驚訝,發現網紅同真人同相片完全唔同樣,形容係「大型詐騙現場」。
現今個個唔P圖唔安樂,出現極多「照騙」情況,唔知信唔信好,好彩救星出現喇!Adobe為咗唔畀P圖為禍人間,與加州大學伯克利分校共同開發一套新軟件,利用AI偵測相片邊個位置曾經被人修改過,仲會建議將張相「打回原形」!
喺開發期間,Adobe請一批人來進行測試,要求佢哋喺相片中搵出P過嘅地方,可惜人類肉眼所見,只係搵到53%,而用AI軟件就有99%嘅超高準確度。不過呢個軟件暫時只可以偵測出人嘅面部修圖情況,「還原」功能亦只適用喺Photoshop P過嘅圖,用其他App修圖暫時唔受影響。
如果功能進化到咩相都可以還原,呢個世界就會減少好多「騙圖」,唔駛再畀「照騙」污染眼睛!各位P圖成癮嘅網紅,趁仲未畀人發現你真身,好收手喇!
圖片來源:Weibo
更多相關文章