Reddit仔原來係懷舊老餅

Reddit仔炒爆GameStop後，再接再勵「狙擊」多隻股份

正所謂一不離二，Reddit仔炒爆GameStop後，再接再勵「狙擊」多隻股份，從這批「Reddit股」，你會發現原來Reddit仔係懷舊老餅。

獲Reddit仔支持的爆炒王係升幅拍得住GameStop的BLIAQ，BLIAQ全名係BB Liquidating Inc.，嘩公司名有清盤字眼究竟係乜？原來就係仍處於破產程序的Blockbuster，Blockbuster曾幾何時係租帶店一哥，連香港都有分店網絡，後來被Netflix完美擊潰成為蚊型股。Reddit仔揀佢固然貪細細粒容易炒，亦睇中品牌係90年代集體回憶方便一呼百應。

另外兩隻被Reddit仔爆炒股係係Koss及AMC

AMC戲院炒落有感情

另外兩隻被Reddit仔爆炒股係係Koss及AMC，被Reddit仔睇中固然係因為前對沖基金經理Will Meade表示呢兩隻股份有機會成為Reddit大軍爆炒股，另一誘因係兩隻股份都係美國老餅宅男熟悉的品牌，Koss係老牌耳機製造商，要知道耳機係打機及聽歌睇戲必備配件，Reddit仔應該有唔少係Koss用家。至於AMC則係大型連鎖院線集團，聯群結隊去睇戲都係唔少宅仔的懷舊回憶。既然兩隻股份都係熟悉品牌，Reddit大軍中的老餅自然炒落有感情，可以更齊心擊退空軍。

大把經典劇集在手的電視廣播，可分拆電商業務冠名為「網中人控股」，內地業務就叫「上海灘集團」

內地業務不如叫上海灘集團

Reddit仔愛炒懷舊股，對港股市場最大啟示係懷舊價值深不可測。只要捕捉到大家的懷舊心理，股份身價可能翻幾翻。例如國泰遲遲未走出燒錢怪圈，太古要撲水分拆太古坊做房地產基金集資，將基金冠名為太古城基金就較太古坊基金更有號召力。又例如大把經典劇集在手的電視廣播，分拆電商業務亦可以冠名為「網中人控股」，內地業務就叫「上海灘集團」，都可以激發唔少「丁力級」老餅觀眾認購支持。

近期新射雕遊戲人氣勁到久未露面的資深投資者「馬Sir」都現身祝賀

手遊股老餅化可取道金庸

另外地區情懷同樣有market，例如總部設在屯門的初創企業，上創仔板索性改「屯門有落」之類，再找知名屯門藝人鄧麗欣做招股代言，都應該吸引唔少屯門人入飛支持。至於手遊股，近期《新射雕》遊戲人氣勁到久未露面的資深投資者「馬Sir」都現身祝賀，可見金庸作品有潛力用來塑造「老餅股」，有手遊股想上市，就不如直接向明河社買主角名或招式名做股份名，例如手遊股叫「楊過軟件」、「亢龍有悔控股」，單係個名都夠勁了。

相關報道：

• 美對沖基金向散戶認輸 平掉 GameStop 沽空頭寸

• 你剛剛攻擊了我的村莊

• 美散戶癲炒GameStop 掀激辯

【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。