雅虎香港財經 
Uber創辦人東山再起
跌低，就起身，係好多企業家嘅特質。
消失咗好多耐嘅Uber創辦人、前CEO Travis Kalanick都一樣唔認輸，日前就其最新初創Cloud Kitchens，籌集了4億美元資金，打算開拓「聰明廚房」東山再起。
資金來源係Saudi Arabia's sovereign-wealth fund。
聰明廚房，又可以叫「共享廚房」，故明思意就係將商廈單位改為廚房租賃服務，如此一來，傳統餐廳亦可藉此拓展外賣服務，釋放日益昂貴嘅實體店面積成本壓力，而當你想進軍某一區，亦可不必再開實體店，透過廚房同運送就可以（delivery-only restaurants）。
其實，呢個模式就係之前嗰個Uber Eats，阿前CEO，而家等於正式開公司打舊公司，真係一地花生。
虛擬廚房呢個模式，市場又真係愈來愈大，根據資料，目前預計市場規模，直至2023年，複合年均增長率都可以達到43%，而另一個市場調查，則預計市場規模到2023年可達到36億美元。36億美元又唔係大，但獨角獸市場就係咁，一開始規模都係由個別企業帶動，通常都係寡頭壟斷，到某個點就會爆發形成大市場。
最近加入市場嘅，仲有一間喺三藩市Bay area開嘅虛擬廚房初創，直接叫Virtual Kitchen，係由Uber前管理屬所開，同一班人，當年就係負責開拓 Uber Eats。
所以你會見到，Uber Eats啦， Travis Kalanick啦，同埋昔日佢啲𡃁，都一齊進軍緊虛擬廚房市場，而其實都係Uber分裂出來。
但唔好以為，Uber創辦人 Travis Kalanick唔使再因為Uber同各地政府交戰，點知Cloud Kitchens都一樣，日前在芝加哥N Rockwell St的新廚房，因為可能會引起當地民居恒常交通擠塞，而引起當地市政廳關注，到而家都未開門。
Travis Kalanick人稱矽谷浪子，作風火爆，睇形勢，前排仲減榜Uber股份，佢今次真係許勝不許敗。
===============
財經精選資訊網站「中環街市」 臉書粉絲頁
