【一句到微】煮出網絡的美味話題(嚴啟明)
所謂「民以食為天」,美食從來都係一個講唔完嘅話題。近年互聯網亦興起咗唔少同美食有關嘅內容,精緻畫面同描述尤其吸引年輕人嘅眼球。今期,筆者會介紹一個「內容名廚」案例,同讀者一齊「烹調」「美味內容」!
Tastemade係一間專門製作食物主題影片嘅美國企業。佢哋由世界各地收集由美食愛好者自製嘅影片,透過分紅制度共享廣告收入。除咗有專屬production house之外,Tastemade仲有埋自己嘅酒吧,甚至附屬嘅烹飪學校!廚師可以喺幕後準備好食物,就攞去幕前拍攝,隨時pro過電視台,「靠得住」!
Tastemade將旗下製作嘅節目放到 YouTube頻道、Apple TV、Android及iOS apps等各大平台上架。同時,佢哋都經營各種社群平台,例如喺facebook等社交媒體po最「邪惡」嘅美食圖,或者喺Apple TV呢類平台製作比較詳細嘅烹飪內容。
雖然話Tastemade製作嘅片主要係美食主題,但係佢哋嘅節目類型就走多元化專業路線。例如,由伏特加品牌Grey Goose贊助嘅《Local Flight》,就專門講解靚酒。節目主持人Shawn Thomas帶觀眾遊走世界各地,包括到Grey Goose發源地法國,探索獨特伏特加蒸餾技術,仲搵到知名調酒師,理解點樣用Grey Goose伏特加混調佳釀。
另一個唔錯嘅節目例子係由Google贊助嘅《Day of Gluttony》(台譯:《今天就要吃》)。節目入面兩位節目主持人每到訪一個美國城市,就要用Google Map搵餐廳,務求喺24小時內去足24間餐廳,實在「玩命」!除此之外,Tastemade亦有一啲香港比較少見嘅飲食節目,好似教整素食嘅《Raw. Vegan. Not Gross.》同埋專門介紹攤販小食《The Iron Grill》。而最特別嘅,莫過於教你點樣整狗糧嘅《Dog Party》!
Tastemade現時有超過400條影片頻道,每個月就吸引超過2,200萬觀眾同1,500萬訂戶收睇,合共1.2億點擊率。Tastemade嘅出現令美國唔少品牌主將電視廣告支出,改去製作類似嘅網絡影片,顛覆影音內容依賴傳統媒體嘅推廣模式。
食、食、食,為你帶來無止境的內容,你準備好走進「烹飪大賽」嘅盛大內容未啊?
嚴啟明(網誌kmyim.com)—Write4U網上創意寫作平台始創人,現為《信報》及《星島日報》撰寫案例專欄。