【大茶飯】A股大冧市揀股攻略(青冰)
對股民來說,上星期過得特別漫長,無他,A股日日股災,手頭中資股利潤唔見一截。香港呢?指數頂得住,但二三線股沽到七彩,又唔見一截,注碼控制得唔好,今年隨時嘔凸!
而家講A股牛市完未已經冇意義,難道你認為一時三刻可重拾升軌?一個人身中多刀再俾車撞,斷估都要唞番半年啩,A股嘅情況正是如此。
現階段撈貨,如果心理質素不佳,建議你先避開中字頭,事關過山車市況肯定未完,隨時扔你出車。就算揀本地薑,都係宜守不宜攻,揀防守力高股份最化算。
今年業績突飛猛進嘅怡邦行(599),最新市盈率6.9倍,息率6.6厘,防守指數達十粒星,公司主要從事批發及零售建築五金、衞浴、廚房設備及傢俬,長實地產(1113)、新地(016)及新世界(017)都係佢嘅客,本地樓市硬淨到暈,生意不愁。另一戰場澳門近日再放寬內地客逗留日子,怡邦行強攻賭場及酒店項目,同樣受惠。從圖表出發,股價已回落至放榜前水平,更一度回補盈喜上升裂口,相信調整已近尾聲,現價入場風險有限。
chingbing888@gmail.com