【大茶飯】一隻碧咸也垂青的股份(青冰)
未推介先認叻,上周愛股中國飛機租賃(1848)啟航,五日升兩成,早幾日放榜,多賺75%至3億,繼續用呢個速度增長,今年可賺5億,用20倍PE計,市值剛好100億,每股折約17元,水位六成,未來12個月到價!
今日推介利標(787),三個原因逐個數。第一,殘爆,舊年上市高見2.2元,而家?1.37元,足足冇咗四成,沽空比率周不時見雙位數,今次業績出乎預期好,下半年交足功課,淡友有難了!
第二,有碧咸,冇甩拖。利標同碧咸成立合營公司,打造娛樂體育兼備嘅品牌,目標五年內規模達10億美金,以碧咸嘅名氣,合營做大做強易過借火,利標總裁樂裕民同萬人迷碧咸老友鬼鬼,呢張卡絕對碌得抵!
第三,美國復蘇概念發酵。利標八成生意喺花旗國,食正概念,今年業績只會更好。
多個優勢集一身,上星期五相信只係升浪第一棍,驚喜陸續有來,要見反彈目標1.7元,其實唔難!