【大茶飯】不再即沉的發達板（青冰）

建滔化工(0148)在十年前分拆積層板業務上市，仲拎咗個靚冧把1888，可惜公司名個諧音相當唔掂，建滔積沉板(1888)，見高即沉板，呢塊即沉嘅板以7.73招股上市，頂咗3個月就破底，之後遇上金融海嘯，股價低見1.50，可想而知小股東怨氣甚重。十年過去，生意長期keep到130億，純利都有12億左右，但股價都長期三、四蚊徘徊，直至去年開始大翻身，重上招股價，點解嘅點解嘅?

建滔積沉板係全球覆銅面板龍頭大哥，市佔率14%，這個板用於生產印刷線路板，適用於生產各類嘅電子產品，咁近年無論在智能家居及汽車電子都愈來愈普及，需求梗係直線上升啦，加上上游的物料供應短缺，啲板仲可以加價添，一個字，發。

除咗做覆銅面板，佢地2012年在江蘇買咗啲地，撈埋房地產添，當年梗係無人睇好啦，不務正業，俾人鬧到傻，不過最近3年，房地產分部每年都提供逾億利潤，去年仲賣咗深圳項目予恆大(3333)，激賺17億，自此踏入爆升之路，公司都冇手軟，中期及末期皆派特別息，全年共派1.12，阿媽建滔即袋25億，爽歪歪。

業績公告暗示咗覆銅面板會再加價，咁本業就肯定唔會走樣，江蘇的物業發展，今年會有入賬，現時內地樓市咁火熱，肯定大賣啦，管理層都擔心市場話佢不務正業，講明唔會再買地發展，以現時凈現金17億黎講，加上賣樓資金回籠，黎緊手頭繼續鬆動，再豪派息是常識吧，撇除去年特殊收益，現價14倍市盈率，行業龍頭，派息爽，去邊度搵呀?