【大茶飯】千載難逢贏錢機會(青冰)
雖然儲局主席耶倫在央行年會暗示準備好今年加息,副主席費希爾更暗指今年可加息兩次,不過,這邊廂香港人似乎無懼息魔來襲,一二手樓市進入火紅年代。無他,全球央行爭相放水,儲局點有條件同把握今年可以加息呢?你知我知大家都知,無怪乎磚頭嘅崇高地位難以代替。
同磚頭一樣咁吃香嘅,當然還有高息股,今日推介東江集團(2283),上市三年從不間斷派息,實在係信心保證。今時今日,普通派息大家又點會滿意呢?東江嘛,年年派送有增長,最新股息率超過五厘,夠晒吸引力。
睇睇最新中期業績,主打多種行業模具及注塑組件的東江,雖然生意額輕微倒退,但由於集團向自動化方向發展,引入工業4.0概念的智能柔性生產線,大大降低成本,盈利因此增長逾一成,純利率大升1.2個百分點至10.9%,現價市盈率9倍
如此抵買,基金又點會錯過呢?金手指惠理基金亦屬東江股東之一,上市後持股有增無減,最新持股達8.08%,值得留意的是,其最新增持與現價相若,證明惠理極度看好東江潛力,而家有機會以相同價錢坐貨,你點可以錯過?