【百萬Blogger】Rachel 之夜（財叔）

剛於過去的星期一完成iMoney舉辦的「講樓慈善夜」講座，好開心同榮幸可以和明哥同場演出，其實我一向好少為這類講座準備，第一因為時間短，第二根本唔知參加者背景，所以我唔知應該講邊個層次好。當然正常係我想講乜就講乜，基本上參加者無得Say no！但擺明係浪費大家時間，除非我目標係搵錢啦！

今次之後我應該短期內都唔會再搞，所以希望唔好令大家覺得真係上當，於是叫iMoney在講座前出個電郵俾大家，睇下大家有咩想知，咁我就講啦！一如我預期，其實來「上當」原來好多都未必知自己想知乜或要乜，都係得幾個參加者問問題，所以我繼續鍾意講乜就講乜算啦！點知最後一刻，編輯通知有人竟然一口氣問左8+3條題目，我初頭都唔知咩叫8+3條，11條咪11條囉！原來係8大題目，其中1題再分3點，哈哈！果然係唔放棄任何機會的參加者，我Like！

最後基本上我成晚都係圍繞住佢問題來講解，大家反應又好似唔錯，所以我真係要多謝佢，一個當晚大家都應該熟悉的名字——Rachel，所以當晚其實應該叫做Rachel之夜！

500張飯票不夠賣

當我諗住一如以往，叫大家即場支持向明哥買飯票，估計反應應該不會太熱烈，但可能今次有明哥即場分享一下使命同堅持，反應出乎我意料之外，我叫義工準備的500張飯票竟然唔夠賣，而其中一位參加同學竟然拿一疊（100張）俾我，叫我張底咭度簽名，我真係好感動！而我為答謝大家支持，當然希望施展渾身解數，再同大家分享啦！但要分享多，當然需要就係時間，而時間就是金錢，要加時就要俾錢，呢一刻我更加體會到自住樓的重要性，之前租其他場，夠鐘就要趕你走，今次個場係「自己友」King Sir的，當然容易話為好多，當我一齊俾完掌聲King Sir後，我就在毫無時間壓力情況之下盡情地講，大家反應愈熱烈，問題愈多，就令我聯想到更多可以同大家分享，最後我覺得非常盡興，而Rachel最後亦無打完齋唔要和尚，現身同我講佢就係Rachel，好！佢今次真係徹底成功，因為我一定記得佢。

所以任何時候，上堂又好，搵樓又好，問清楚，一定着數！點樣令到你想佢記得你人記得你，呢個都係成功秘訣㗎！機會其實係自己爭取！大家記住啦！

作者：財叔

擁有20多年投資物業經驗，見證樓市高低起跌，1997年金融風暴、2003年沙氏谷底、2008年金融海嘯，均成功管理風險安然度過，要訣是識得計數。昔日廢青，會考兩科合格，目標明確，如今未足50歲達致財務自由，辭工追夢，助人助學，希望可啟發更多財務自由人，找到心靈富足。本欄所得稿費，全數捐贈慈恩基金會作慈善用途。（本作者文章隔周刊出）