雅虎香港財經 笑到最後｜比較幾次納指跌市（高明）
上星期本欄發表打氣文2.0，開心咗一日，之後又再跌過，打氣除咗安慰自己外，實際做唔到令股價反升嘅求雨舞作用。
美股跌勢歷來都係急勁快，一開始跌勢，就會絕望式下跌，中間少少希望都畀唔到世人。今次算係多假希望證明市場被真正打低前，本來資金對後市十分踴躍。
美股、外匯、加密貨幣免費即時報價，自選投資組合獲取相關新聞提示。
橫掂個市跌咗落嚟，呢度亦都係少數叫人硬食美股霸權股跌幅嘅專欄，不如溫習吓近期跌市發生咩事。事實上，高明係真正嘅圖表派，點樣分真正同唔係真正，真正嘅圖表派，會真金白銀經歷過成個圖表嘅痕跡，唔係左閃右避，做觀察圖表派係另一回事。 因為冇放低注碼，對於圖表嘅經歷就打折扣，成為一個旁觀者，反而有真金白銀落注，經歷整個圖表，先至知道圖表走勢嘅過程。
2020年打後，連同今次經歷5次主要下跌， 2020年前就有佢，因為量化寬鬆後嘅資金、疫情對生意嘅扭曲，環境唔同咗，已經冇辦法直接比較。 最嚴重嘅姿勢就係疫情啱啱開始嘅2020年2月到3月， 納指下跌32%，對三倍ETF例如TQQQ可以帶嚟毁滅性跌幅。 下跌嘅主要原因係疫情，時間相對較短，大約個半月就跌完，因為當時前總統特朗普粗暴要求聯儲局再次量化寬鬆同大幅減息，結果救返個市。
年底恐難見17500
另一次跌幅就係2020年嘅9月，當時因為Tesla（TSLA）及蘋果（AAPL）拆細效應太強，本來短期股價升得太勁，拆細一實現股價就大跌11%。至10月底嗰次就係餘震，唔太算主要跌幅。 然後反彈去到年尾跨年升到一月底， 主要因為當時憧憬經濟重啟，連傳統股都鬆綁，待富股（當時稱為契媽股）直接炒到癲。事後睇返， 升市原因同孖展鬆綁有關，傳統股上水，有能力做孖展，於是走去炒待富股。
以上兩次跌幅，對於今次下跌參考價值接近零，因為同息口環境冇直接關係，即使疫情前已經有總統批評美國聯儲局息口加得太快，但真正下跌原因都係疫情。
另外兩次下跌分別為今年2月及9月嘅跌幅， 兩者分別下跌12%及7%，兩次跌幅都可以作為今次下跌嘅參考，因為下跌嘅主要原因係10年期國債息急升。唔同嘅係，今次跌市債息大致維持1.4至1.5厘水平，上兩次則以息口急升作為跌市直接原因。
另外，今次聯儲局公布加息時間表後，指數立即反彈超過2%，隨後嘅下跌，主要因為英倫銀行加息令市場更多憂慮以及Omicron 被人為吹大影響。
如果用加息嚟計，過去咁多次都未曾試過因為加息而令個市玩完，否則納指唔會不斷創新高。由11月中跌勢開始起計，納指已經跌足一個月，時間上已經接近甚至超過部份跌嘅長度。至於跌幅，正如上次打氣文話齋，都係叫大家揸住霸權股硬食，當畀鬼砸一輪，好快又會再破頂。之前講年底17500點，睇怕今年升唔切了。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
