【胡‧說樓市】屏欣苑裝修15萬搞掂！新居屋業主可借橋？

新居屋通常只係清水樓，連間隔牆都無，需要業主再揼一筆錢裝修，如果想慳又想靚的話點算？今次「屏欣苑」嘅業主，只用15萬就搞掂裝修，唔知各位新居屋準業主又可唔可以從中借橋呢？

黑色鐵框鑲上玻璃窗，牆上髹上暗藍色調。黑色線條掛燈，雙人床置中前方放置淺啡色梳妝枱，小小睡房營造出的北歐風格。純粹看這個角落，怎也想像不到自己身處的是居屋單位。但如假包換，這裡真的是新居屋: 「屏欣苑」，坐落天水圍西鐵站旁邊。

由單位外望，高高在上可以俯瞰「天水圍西鐵站」，對面就是天水圍「嘉湖山莊」。因應睡房運用玻璃間房，可大大增加單位的透光度，設計師也刻意將優勢發揮到盡，透過玻璃間隔將陽光散佈屋內每一角落。

由於單位只得兩夫婦居住，所以兩房已夠用，只是對個別家庭來說，如需要間三房的話，就需向客飯廳偷位。

現時單位布局沒有大改動，也令客飯廳望落相當闊落，長直形開則也顯得壁壘分明。在玻璃睡房前，不單有充足位置放大組橙色皮梳化，在梳化旁近厠所位置一幅五呎小牆身，設計師還選擇在頂部做了射燈，配合戶主的高身盆裁，令單位望落不至於太過單調外，而且更有生氣。

至於近門口位置的飯廳，背牆設置到頂儲物櫃連鞋櫃，設計師刻意改細近廳房房門，務求令客廳更合比例。

至於設於入門口位置的廚厠，業主只作簡單裝修。所以四百多呎新居屋，最終花了十五萬元裝修費已可完工。設計師表示，近期交樓的長沙灣「凱樂苑」、彩虹「彩興苑」間隔類近，值得準業主參考。