【股壇衝鋒車】用市帳率測港股底部（周沖）

今日係農曆七月十四，相對於近全球股大插水，很多炒開股票的面對如此劣勢，凡反彈就走貨輸少當贏，他們常戲謔「逃生門快關上」，若不沽貨便隨時進入鬼門關。言下之意，就係逢超賣後反彈就要減倉，因為目前的中港股市猶如重病者，唔會一時半刻可治癒，一個上升周期結束了，下跌周期剛展開，切勿貿然入市溝貨。

昨天中港股市便玩死人，A股先跌4%後倒升5%，然後收報跌1.7%，港股也CHOK過林峰，期指先低開然後倒升200點再大插462點，9月期指收報21113點，跌462點，今日期指結算，預期又係波動的一天。周沖講過，面對呢個反覆向下市況，估底屬危險動作，最安全的方法當然係做塘邊鶴靜待見底訊號，昨天講左3個散戶動作判斷大盤是否見底，今天用較科學的PB數字去推測恒生指數跌到什麼位才見底。

PB即市帳率，內地股民則稱市淨率，1998年亞洲金融風暴，恒生指數低點的市帳率為0.93倍，若用此標準，今次股災港股要插落17800點或者才見底。2008年金融海嘯時，港股低點市帳率為1.01倍，對應目前恒指要跌到19300點。昨天港股收報21080點，市帳率為1.1倍，市盈率則為9倍。

周沖並非驚嚇大家，只係用數字說明實況及作出推算，事關每次股災的成因及復元情況均不同，加上近年愈來愈多黑天鵝出現，數字只係作為預測的其中一個方法，今次港股跌到什麼水平才見底，目前最佳的參考指標係內地經濟及A股表現，以及自已持倉的股票屬優質股才有穩守的本錢。或者前特首董建華名句「中國好香港好」講得啱，但佢老人家似乎冇講下句，「中國差香港更差」。

chowchung123@yahoo.com.hk