【健談匯市】新興市場成重災區（陳健豪）

還有不足兩個星期，2015即將過去。回顧過去一年，股票市場屍骸遍野，目前全球已有27個主要國家的股市，比起今年的高位已下跌超過10%，而且歐洲、美洲、亞洲、非洲甚至中東地區無一倖免，有報告就指對上一次出現此現象就在2008年，可幸美股只從高位回落不夠1,000點，但目前資金一面倒湧向美元資產及美股，令美股投資者亦出現警號。當然另一重災區在新興市場，很多新興市場國家股市匯市同樣重創，例如明年舉辦奧運會的巴西，股市就由高位總共跌去13,000點或22%，而其貨幣亦跌至歷史低位，準備明年現場看奧運的旅客就有福了。有些國家更慘，環球經濟復甦動力慢自然令股市受壓，再加上油價下跌及美元急升，其中韓國就在油價急跌的基礎上股匯雙殺，韓圜亦跌至兩個月的低位，不過最大件事都係想講講南非。

南非總統 Jacob Zuma 換走財政部長Nhlanhla Nene，接任人係國會議員 David Van Rooyen。
南非係黃金生產大國，全球金價低迷令當地生產商叫苦連天，因當地生產商係全球入而生產成本最高。南非經濟唔好都唔係今日先知，例如第三季國內經濟增長GDP只得可憐既0.7%，即係勉強叫做「保 1」! 唔係「保7」呀。而南非犯罪率、強姦案多人所共知，但有頭髮邊個想做癩痢? 南非經濟唔好，失業率高達25.5%，呢個數據比起部份歐洲國家更加高，而評級機構亦先後將南非的前景展望下調，評級只比垃圾級別高一級，發債成本提升，企業經營更難上加難。經濟差，炒左個財政部長都好合理，問題是繼任人David Van Rooyen乃何方神聖?

經濟學家就指，完全無聽過呢位人兄在財政及經濟上有任何往績。不單沒有在任何中央行銀任職經驗，亦無在地方政府出任要職，就立即空降走馬上任，即係你同我或阿豬阿狗都可以出任。筆者曾經講過，自歐債危機後大部份經濟唔好既國家都換晒政治班底，希望搏一搏單車變摩托。不過今次市場明顯擔心新不如舊，可以做既唔係用腳投票，而係用手指不停沽出南非蘭特投下不信任票，難怪南非蘭特已經跌至歷史低位啦。不過講番轉頭，因為南非黃金生產商開採成本以蘭特計價，但出售黃金就可以收到美元，美元兌南非蘭特跌穿歷史低位反而刺激當地生產商既股價因禍得福，其中Harmony Gold Mining就急升25%，是16年最高。

ADS Securities 零售市場銷售總監陳健豪