【大茶飯】齋睇業績搵唔到食（青冰）

現時每逢出業績，純利增長固然重要，但最影響績後股價表現的，就是能否勝預期，講到呢度，大部分散戶都嗤之以鼻：哼，全部都係大行演譯架啦，任佢地吹。青冰唔否認有些時候，某幾間行對某些公司或行業，係舉足輕重，可以指鹿為馬，但大部分情況，遜預期的確好難會升。

至於這個預期，坊間最常拿的就是彭博資訊，佢歸納聚多分析員的估算，取其平均數，聽落就好科學，但統計學成日都強調，樣本愈多，誤差愈少，數值就愈可信，但其實某些較冷門的股份，會比較少投行cover，咁既然都冇乜人研究，仲點會有報告去估呢，換言之，某些公司只有十間八間做預測，咁誤差的機會就更高，是優是遜，真係未必可信，所以大股的estimates，才比較有意思。另外一點就係，話明係彭博數字，就梗彭博用家先會去提供估算啦，但須知道，國內用彭博機不算是主流，咁好多中小投行都唔會參與估算，但好多時候，內地分析員掌握更多及更快的國內資訊，佢做的分析及估計，先最值得參考呢。

現時唔少公司都會有每月數據公佈，例如舜宇(2382)及丘鈦(1478)，會有每月出貨量，而大小內房都會每月出銷售額，所以大家對於個營業額，應該都可以掌握得七七八八，未知數就是經營成本及稅務支出，又或者是，一些失驚無神的特別撇賬。除咗營業額相關的，最值得花精神搵的，就是期貨及原料價格，資源股跟期貨炒，肯定快過等業績公佈，要搵工業股，你睇實國內網站生意社的產品銷售或原料價格，亦會跑快人幾步。

係呀，資訊發達又泛濫，齋睇個業績，已經唔足夠，但這是一個最根本的出發點，業績冇穿冇爛又有概念，再花多點時間做功課，也是值得，但能涉獵的公司及行業，始終有限，所以，也請原諒青冰，不會每隻股都可以給你一個深入又滿意的答覆，再者，有時你比青冰更了解那股，只係想找多個人認同而已，係咪？
Fb個人專頁 http://www.fb.com/chingbing888