共享單車為何沒有盈利?Gobee.Bike六大死因
中國一直將共享單車,納入「中國新四大發明」之一,但原來呢種發明,都唔係好賺錢。話說Gobee.Bike宣佈結束業務,表示「業務未能錄得盈利」。
點解共享單車會無盈利?歸納過去共享單車在港發展歷程,以下就係Gobee.Bike六大死因:
1.Gobee.Bike已非獨市
香港地少人多,共享單車市場,本來就好細,但今日Gobee.Bike再非獨市經營,加上有師奶以時租計算,認為Gobee.Bike唔抵踩,價格競爭無優勢,導致營運雪上加霜。
2.港人主張「唔好一味講錢」
成也共享單車,敗也共享單車。港人主張共享模式「唔好講錢」,間接限制Gobee.Bike搵錢能力;但當發現原來都係講錢,香港人,又未必會畀錢你賺。
3.維修開支龐大
本港氣候因素,加上使用者不自律,導致單車維修開支龐大,根本「無肉食」;試過有市民投訴,十架有九架都係壞車。
4.與單車舖直接競爭
既得利益行業盤根錯節,美其名共享單車,實際是「自助租單車」,與單車舖直接競爭,而單車舖,不會坐以待斃。
5.單車違泊嚴重
本港單車站點設計落後,地點較少,以致單車經常阻街,到處違泊嚴重,最終被胡亂棄置,有市民稱:「共享單車,多如細菌。」
6.政府遲早會監管
社會已有聲音要求加強規管,政策上,長遠只會更難做。
事實上,Gobee.Bike於2017年進軍法國市場,2000架單車投入服務,最終因為多宗盜竊和破壞行為,一樣撈唔掂,今年初已宣布終止單車服務。
筆者唔敢好似其他作者咁,話共享一定唔得,但暫時,真係見唔到,共享單車有超成功賺大錢的例子。如果有,大家不妨分享一下。
===============
財經精選資訊網站「中環街市」 臉書粉絲頁