【扮工收風】大學秘書被老點執倉 憤然辭職
好多人覺得秘書係老闆嘅線人,因為怕被告寢頭狀,所以好多打工仔都忌秘書三分。之但係秘書其實好多時都有苦難言,跟定一個老闆都仲好啲,之但係老闆成日轉,每次一轉就好似轉咗份新工咁,好多時都被玩到暈陀陀。
某大學部門嘅秘書就係遇到呢個情況,因為部門主管每隔幾年就換一次,所以秘書就算長做呢個位,都會隔幾年要轉一次老闆,重新適應新老闆嘅作風,好似返新工咁。
遇到好老闆就話啫,遇到個衰嘅,就真係苦上加苦,新官一上場就要秘書做餐死,除咗要同佢摷晒過去四年嘅文件,逐一解釋部門開支之外,仲要屈佢去執倉,因為新老闆要知道倉入面嘅所有存貨數量,仲要確保數字非常準確。
其他同事基本上完全冇諗住幫拖,因為個倉係好耐之前已經有,經歷過不同「朝代」,總之係有嘢唔急用就放入去,所以成個部門都冇人肯認投啲物資。大家仲話:「秘書喺呢個部門做得最耐,佢應該知。」
就係咁,秘書就被屈咗去執倉點數,做咗一日之後,佢就決定直接遞信。
職場世界真係無奇不有,老點自己秘書去執倉,真係算罕見!
===================
19網輕鬆爆料熱線,歡迎舉報老細同事19惡行,立即click入去講畀我哋知啦