【異動尋寶】美股股災 畀位你買？（魏力）

武漢肺炎疫情蔓延全球，美股周一大冧超過3%。

上周文章講到四個後市吉凶指標，成功避過隨後幾日的跌市，希望亦幫到大家。武漢肺炎疫情蔓延全球，美股周一大冧超過3%，道指大瀉1,000點最吸眼球，記得現任美國總統曾揚言，如果有總統在位期間，美股單日冧千點以上，應該將佢綁在炮彈射向太陽，唔知佢依家上咗炮台未？

雖然美國大瀉，但魏力當晚做法係「沽金、平一半SQQQ，再買貨」，risk-on mode，點解？又係靠上星期講的四個指標：人民幣、美匯、金、VIX。當晚美股開市插到收市，但人仔卻回升，美匯向下，前者反映市場相信大陸疫情在受控，而美匯去到100關前掉頭，可能是回流新興市場準備執平貨，或至少不是湧去美元避險。

大插插短線博彈

至於金價，過去一周漲近100美元，去到1680樓上，但就在美股開市之後，金價就輾轉回落；VIX開市抽升4成後，亦沒有一路扯上去，處於橫行窄幅上落。四個指標話你知，市場似恐慌，淡友在平倉，再跌空間不多，買上有值博率。再說，納指高位回調已達7%，廢如港股都係跌10%（29000跌到26100），美股會唔會跌得多過港股？魏力相信機會不大。

至於A股（特別是創業板），可謂「神奇、頂級、超卓」，創業板日中插完4%，收市竟然倒升1%，「點解會炒成咁？」我答你唔到，炒放水、炒5G基建，炒乜炒物，股市向來都是炒憧憬，日日1萬億以上成交，但北向外資在食糊流出，邊面可以笑到最後？我相信會是後者。

筆者為證監會持牌人，持有美股SQQQ。

魏力

www.facebook.com/2012jason

本欄逢周三刊出