笑到最後｜美元霸權反撲的啟示（高明）

今年反撲嘅唔係美元，係背後需要維持美元地位嘅人。 (Yevgen Romanenko via Getty Images)

今年剩低最後一個月，投資市場今年試過大跌、反彈、成隻加密貨幣執笠，最後一個月，睇嚟都好似打籃球得返幾分鐘嘅垃圾時間，波幅唔會太大，觸發嘅事件都冇之前咁誇張。

下載Yahoo財經APP

順勢做一個回顧，今年最大贏家，係美元。本欄完全唔需要引述任何美滙數字，只要單睇大家嘅股、滙、樓、幣嘅表現，已經知道美元嘅強勢。加息當然係主因，但係遠因相信都係權力使然，大約兩年前，網上興起「美元已死，Crypto當立」嘅類似睇法，並付諸實行炒爆加密貨幣市場，連部份政府都落疊，例如新加坡淡馬錫對FTX投資等。

權力越大 話事權越大

貨幣嘅霸權，在於有人肯收。例如去歐洲旅行，正常你都會唱歐元，求其一間找換店就唱到，但如果去非歐元區，例如匈牙利、塞爾維亞之類，喺香港就唔係咁易唱，一係到時碌卡等佢兌，一係落地先搵找換店唱。大家平時見嘅法幣美元日圓歐元太勁，其實世界上都有好多地位低過加密貨幣嘅法幣。

一隻貨幣全球流通人人想要，背後用好多時間精力去做，而且亦有一定偶然性，唔係話你想國際化，人哋就接受。例如美元霸權，除咗石油交易貨幣外，更重要係世上大部份正常消費力嘅人，一起身已充斥美國產品，要買嘢就要唱錢，甚至Netflix（NFLX）、YouTube等個個月自動扣錢。

有呢個前題，今年反撲嘅唔係美元，係背後需要維持美元地位嘅人，透過加息嚟清場，依家好清楚，美元依然係絕對嘅霸權，一加息其他所有資產都死晒，亦都成功令到加密貨幣繼續維持一種資產嘅存在，而唔係貨幣。

點解再差嘅市況，都唔係直線向下插，因為既得利益受損嘅人會用盡一切辦法反撲，有反撲成功嘅例子，例如美元，亦有失敗嘅例子，例如賣盤失敗嘅FTX。講到尾，都係權力越大，話事權越大。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出