金融花生│孫悟空大鬧天宮 點止遊戲咁簡單（言平）

悟空呢隻遊戲足足用咗6年時間研發，燒咗4億人仔。 (CFOTO via Getty Images)

以前細細個打機，多數都係一啲外國遊戲，例如細個接觸嘅日本紅白機，就係玩孖寶兄弟，到大個咗其中一隻好出名嘅遊戲AOE（Age of Empire），都係一啲外國遊戲，無論日本或者海外，一直雄霸遊戲市場多年。嚟到2024年，終於有一隻係國產，而且有好多外國人都玩嘅遊戲，講嘅就係近日推出嘅一隻非常火熱國產遊戲，叫做悟空（WUKONG）。呢隻遊戲足足用咗6年時間研發，燒咗4億人仔，動用無數資源，最後成為一隻3A級國際遊戲。同時總線上人數高達三百萬人，為有史以嚟最高紀錄。唔單止咁，有外國玩家直頭拎本西遊記嚟睇，而且連遊戲平台Steam嘅評級都極為高分，仲勁到PS5賣斷市，華强北顯示卡加價20%，就連中國外交部發言人都要出嚟講話呢隻game反映咗中國文化吸引力。

下載Yahoo財經APP

美股外幣即時報價 多國新聞任睇

究竟呢隻遊戲有咩咁特別呢？首先呢隻遊戲畫質靚到直頭好似電影一樣，好多唔打機嘅朋友睇完之後都嘩一聲，以為喺度睇緊高清電影。另外，當中好多取景都係實地考察，然後按比例接近真實還原，所以呢隻遊戲唔單止反映咗中國西遊記嘅中國文化，同時亦都有好多中國山河美景可以觀賞。

展示軟實力機會

另外我哋要明白，今時今日嘅科技已經去到模擬控制，嚟緊打仗都係用無人機去打，即係話好似打機一樣用遙控掣去遙控一啲無人戰機，無人坦克，而家俄烏戰爭已經用緊無人機或者已經有機械狗去作戰，關鍵係背後需要大量遊戲高手去操控呢啲嘅戰鬥群，只不過今次佢哋唔係打機咁簡單，而係遙控緊真實戰場上嘅實體機，需要快狠準，能夠準確最快速度去到目的地，同時又能夠好準確地用導彈擊中對方，呢啲背後係好需要大量精密遊戲玩家去操作，所以今次中國有咁多人去玩呢隻3A級嘅悟空，背後某程度上都反映中國係有能力可以有呢類大量專才作戰，所以背後都係反映緊中國嘅軟實力，所以點解中國外交部咁高調出嚟講，除咗係文化輸出之外，更重要就係想顯示到中國未來戰鬥實力可以去到有幾強。

最後順帶一提，今次悟空呢個名並唔係用英文翻譯做Monkey King，而係用普通話譯音WU KONG，就好似我哋唔再叫叮噹，而叫多啦A夢，又或者唔再叫漢城而係叫首爾，依啲名字嘅背後唔係淨係改個名咁簡單，而係反映背後另外更深層次嘅意義，所以今次孫悟空大鬧嘅唔單只係一隻遊戲，甚至乎顛覆咗整個國際對中國嘅睇法。唔好忘記，仲有唔夠100日就美國總統大選，唔遲唔早，悟空偏偏揀呢個時候出場，你話點解呢？

言平

本欄隔周四刊出