【大茶飯】搶住供的北水愛股(青冰)
連續兩星期提及的細價股,表現都未見理想,正常股評都會稍為調節一下,轉推大股,不過青冰眼見近日領頭的內房、汽車、手機及資源股,紛紛倒下,唔少股份更從高位跌了兩成,剛出的Q3業績,普遍係稍遜預期,無論呢隻仲係唔係慢牛,按理都唔應該去接飛刀,君子不立危牆之下,係咪?
青冰在早幾日另一專欄話,唔少北水持續買入的股,仲係未郁,所以可留意北控清潔能源(1250),今天就詳加解釋。呢隻股9月4日加入深港通,自那天開始,北水日日吸納,按港交所記錄,現時已持有11.1億股,佔發行股本1.7%,青冰用每日的加權平均成交價作估算,北水入場平均價為0.204,以星期五的收市價計,有一成水位。
睇完手影,都要研究下隻股搞乜的。北控水務(0371)兩年前買殼,目標就係想發展光伏發電業務。兩年過去,光伏發電業務初見成效,上半年營業額達38億元,半年純利6.3億,雖然公司揸住23億現金,不過負債都唔少,長短債加埋有46億,但要發展光伏發電,是需要錢錢同錢,所以佢地7月又宣佈七供一股,供股價係0.17,集資13億,最離奇係供股只有26份有效申請,佔可供數目49%,諗住其餘係包銷商食晒啦,點知有股東申請的額外供股,錄得超購兩倍,似乎係有識貨之人爭住供。除咗供股,公司上月亦向一班董事授出購股權14.9億股,行使價係0.199。
無論係北水入場價及購股權的行使價,都係兩毫左右,反映現價十分值搏,再睇下同是光伏概念的保利協鑫(3800),自9月以來累積升了5成,咁身為一隻光伏股,兩年未炒過,無論係趁低吸納,定係突破0.24阻力先追,北控清潔能源都的確小注無妨。
Fb個人專頁 http://www.fb.com/chingbing888