香港股市 已收市

【我係邪惡HR】三個世人對HR的誤解(HR小薯蓉)

【我係邪惡HR】三個世人對HR的誤解(HR小薯蓉)

「其實你份工做咩架?」

「點解你有咁多嘢做?」

「你地成日都幫住公司嘅!」

每次聽到呢啲說話都一額汗,唔知點回應好。 好多人以為HR嘅工作就係見下人、計下糧, 得閒幫公司刻薄下員工咁,全部手板眼見工夫, 其實又係咪真係咁簡單?

計糧係電腦計?

相信每個HR都聽過:「你計糧唔係㩒個制就得嘅咩?」 而家人工智能開始興起, 我唔排除未來嘅人工智能真係可以做到全自動化計糧, 但今時今日仍然有好多細節係HR system未能夠處理到。好似做飲食、零售, 就有好多特別數要計, 好多做payroll嘅同事每晚喺公司捱更抵夜, 為嘅就係準時出糧畀同事。雖然話system會有幫助, 但一個好嘅system價值不斐,唔係每間公司都負擔得到。

HR操生殺大權?

有時同朋友傾下大家嘅工作,好多時都會聽到佢地話:「 你份工都幾得意,有得做下面試官,決定下別人生死, 好似好好玩咁。」請人唔係玩玩下,我地要向Line Manager負責,請唔到人真係唔方唔好玩。 選唔選擇一個candidate唔係淨係睇求職者嘅當日個人表現 ,仲要考慮團隊特質、個人性格等等。 喺招聘過程HR會畀一定嘅意見, 但最終決定生死嘅通常都會係用家,亦即該職位嘅主管。 有時我地建議請嘅最終可能唔請,唔建議請嘅亦可能會請咗返嚟, 生殺大權並唔一定喺HR手上。

永遠係公司嘅爪牙?

好記得日劇《半澤直樹》裡面有個勁乞人憎嘅銀行邪惡HR。 只怪佢個造型太維俏維妙、演員演技太好, 睇到人好想喺電視機捉佢出嚟打。 可能HR係公司嘅爪牙呢個想法太深入民心, 所以喺電視劇入面通常都係奸角。 真正嘅HR當然某程度上要為公司利益考慮, 但令員工做得開心都係HR嘅責任,下下幫公司刻薄員工, 員工走曬對公司一啲好處都冇。要平衡公司同員工之間嘅利益, 呢份工唔係咁易做㗎。