【我係邪惡HR】3條HR專業嘅界線(HR小薯蓉)
每個職業都有佢嘅專業形象,一兩個害群之馬就可以將成個行業搞彎曬。咁多年嚟HR都畀人鬧唔少,有啲人可能係無理取鬧,但亦都唔排除有人真係因為唔專業而害咗成個行業。HR嘅工作經常被責任、法例、守則等等規範,有啲界線唔守,就等同自毀形象。
1.高度保密
HR有滿腦子秘密,畀人嚴刑拷問都唔可以講出口。最重要莫過於全公司嘅人工同埋同事嘅個人資料,我地處理所有有關嘅文件都要格外小心。聽過有人錯手入加人工信入埋第二個同事嗰封入去、將有個人資料嘅email send咗畀唔應該睇到嘅人,呢啲都係HR嘅低級錯誤,真係諗下都驚。就算平時坐喺位做嘢,有陌生人走近都要嗌唔好⋯行埋嚟,等遮好啲機密文件先好過嚟。
2.奉公守法
做HR要清楚各種勞工有關條例,有責任奉公守法,保障公司同同事嘅利益。例如俗稱713嘅《2007年僱傭(修訂)條例》到十年後仍然有公司被踢爆冇跟法例做嘢。其實當年條例一出,勞工處都舉辦咗好多講座去講解條例,作為HR係冇可能唔知呢條修訂,唔排除有明知故犯嘅可能性。又或者有時可能係啲老細想諗縮數攪著HR,但老細你縮還縮,都要合法先得。
3.以身作則
公司啲守則通常都係由HR去執行同發佈。例如食飯唔可以食多過一個鐘、遲到5分鐘收warning、星期五唔准著便服、電腦唔可以上Facebook,呢啲咁乞人憎嘅規矩通常都係由助紂為虐嘅HR幫老細定出嚟。雖然有時自己都覺得乞人憎,但既然定得出嚟,HR全體仝人都要跟到足。聽過有啲HR主管要下屬守規矩,但自己就犯曬規。如果HR主管都唔以身作則,守則就形同虛設啦。