雅虎香港財經 【我係邪惡HR】HR唔係你敵人（續）（HR小薯蓉）
上一篇講到HR好多時因爲喺招聘過程中引起負皮，令HR名聲每況愈下，成為大眾心中嘅公敵。當呢種印象深深烙印喺別人心裡面，要改變就變得越嚟越困難。曾經遇過有位求職者，佢喺面試過程中表現很「寸」，經常同HR對著幹，但對line manager就態度十分良好，相信佢對HR係有先入為主嘅負面印象。
討厭HR嘅人唔會因為收到offer而改變，佢堅信HR係敵人，入到公司依然會當HR係永恆嘅奸角。
「HR永遠都企喺公司嗰邊㗎啦。」
「佢地係公司嘅爪牙、壓迫員工嘅最魁禍手。」
實情又係咪咁？HR嘅職責係需要平衡各方面嘅資源，因此難免會畀人有咁嘅印象。不過，難道HR真係唔會做一啲對員工有益嘅事？我喺度分享一下個人嘅經歷。
記得好幾年前，政府剛開始建議實行5天工作週，當時公司內部已經有實施5天工作嘅聲音。薯仔公司嘅HR好早向管理層建議實行5天工作，但建議遭到其他部門主管嘅強烈反對，最終難以實行。不過好彩嘅係HR冇放棄，過咗一段時間再提出建議，終於得到管理層通過。
員工調整薪酬，文件一定會經過HR審批，大家可能會覺得份文件入得HR，個數一定係會畀人壓到體無完膚，其實事實又未必係咁。曾經試過有部門提出嘅加薪幅度較市低，最終主管接受HR嘅建議提高薪酬。
到攪福利活動嘅時候，HR同樣會遭受莫名其妙嘅敵視。
「我公司HR成日都攪埋啲好廢嘅活動⋯」「Annual Dinner又係抽呢啲cheap cheap禮物⋯」
「年年都攪呢啲，佢地仲有咩做？」
其實有頭髮邊個唔想免費帶你去廸廸尼玩吖？HR攪員工福利活動，唔能夠唔考慮公司嘅資源。唔係每間公司都好似跨國企業咁多資源攪福利，其實好多公司HR已經用有限嘅資源帶最好嘅畀大家。可以嘅話，其實HR都希望公司投放多啲資源喺員工身上，雖然多資源代表HR會特別忙，但辛苦得嚟員工開心，有時滿足感就係咁嚟。
可能大家都有過不愉快嘅見工經歷或者喺公司遇過啲難頂嘅HR。無可否認，每個行業嘅人都有好壞，正如你買嘢會遇過好嘅服務員亦都會遇到壞嘅一樣。我依然相信大部份嘅HR都係專業嘅，將來可以做得更好，幫手改善HR嘅形象。
做咗HR十多年，由薯仔做到變薯蓉。HR係咪高高在上？又廢又冇野做？查實我地幾分傷心幾分痴，有苦自己知！見盡奇形怪狀CV、見工奇行種、各式各樣嚇死HR事件，深明做HR嘅辛酸。2015年開設Facebook個人網誌「HR小薯蓉」，2017年出版《我係邪惡HR》一書，分享作為HR的所見所聞。
HR小薯蓉Facebook專頁：https://www.facebook.com/hrpotato
HR小薯蓉網誌：http://www.mashedpatata.com/
