雅虎香港財經 【樓市贏家】合法的誤導 小心發展商的改名「偽」術（徐峰）
古語有云，唔怕生壞命，最怕改壞名，人改個好名係唔係可以改變一生，筆者真係無乜研究，但一個樓盤改個好名，就真係可以扭轉命運。
筆者近排同一個妹妹傾開計，本身呢位妹妹自己一個人住緊佐敦一個唐六樓一房單位，大約交7000蚊租，但依家計劃下年同男朋友同居，兩個人嘅預算加埋可以租個大少少又有設施的屋苑，於是就問定筆者少少意見。
阿妹妹劈頭第一句同我講想租Yoho，仲話上網睇過吓盤，筆者聽到即時諗到係Yoho Town或者Grand Yoho啦，點知一路講落去，開始有點唔對路，因為佢話個Yoho樓齡新嘅，即係唔係Yoho town啦，但又話萬三四都有啲盤，Grand Yoho又應該無咁平。
於是筆者就問，你想租邊個Yoho先？妹妹話，吓，有咩分別啊？筆者就好詳細解釋，Yoho Town有十幾年樓，平啲同近西鐵，Grand Yoho都近西鐵同好新，但就貴，而Park Yoho無咁貴又新，環境綠化啲，但好吊腳。
原來佢一直睇緊嘅都係Park Yoho，但就以為喺Yoho Town附近，搞錯晒！少年，你太年輕了！
其實搞錯的又何只一人，想當年新地推售未改名做Park Yoho的峻巒，銷情一般過一般，隨後期數即刻由另一組人接手，並命名為Park Yoho，即時大賣，當然發展商當年是推出唔少付款計劃吸引買家，但當中有無人係誤當Park Yoho係Yoho Town系列而去咗睇樓，之後先買樓？相信為數不少，筆者在售樓廠都聽過好幾個客咁講。
又咁講，好多時發展商改名時，都會用一啲系列名，唔知係貪其好意頭定有心令人誤會，好似九龍站有天璽，奧運站就有瓏璽，去到南昌站加多個匯璽，山頂倚巒曾經創下多次新高，元朗直頭整個幾乎同音的爾巒，所以有時買樓真係要好小心。
=============================================
