雅虎香港財經 【樓市贏家】屯門梗房月租九千之謎（徐峰）
在香港，大部份的新盤都有一定的捧場客，無論是百幾呎的劏房，或是幾千呎的豪宅，賣到貴一貴都大把人排隊買，更有些人為了想住新樓，不措以近萬元一個月，租住新盤的分租房，件事都幾令人費解。
其實筆者身邊好多親戚朋友都好想買樓，時不時都有人問邊個邊個盤好唔好，值唔值之類的問題，而同時亦會有好多朋友問我，明明新樓貴過二手咁多，點解都仲有咁多人爭住買呢？
而筆者大部份情況都會答，以往來說，其實新盤除了無人住過，唔使怕有兇宅之外，比起二手樓最多就是多出一個好睇但相信好多人都用唔著的會所，而近年好多人買新樓的原因，就是貪有「呼吸Plan」或者過渡性貸款等等按揭計劃，始終在政府辣招下，好多人買二手樓都有按唔足的情況，要靠發展商提供的按揭才可以上會，所以畀貴一截的樓價都要買一手樓。
但睇返近年的新聞，好多時都會發現有人會用好貴的價錢去租一個新樓的其中一個房間，好似位於掃管笏的滿名山，入伙無耐好新淨，有業主把一個兩房單位的主人房出租，並由一名單身女子以月租九千蚊租用，雖然話租金已包水電，但個房只有80呎左右，即呎價超過110蚊。以為這個是個別事件，今年初就有業主把將軍澳日出康城緻藍天一個房四大單位分套出一間約110呎的套房，月租9000蚊，呎租都要成82蚊，都是將軍澳有史以來最高呎價紀錄。
如果你話畀四、五千蚊，連一個劏房都租唔到，而要用一個好貴的呎價去租梗房，筆者都覺得情有可願，但如果月租都要成九千蚊，畀少少心機，其實都可以係市區租到個似樣少少的單位，好似筆者就有朋友用緊九千蚊租緊太子一個實用300幾呎的單位，雖然幢大廈是有點兒舊，又無會所，但內櫳都保持得幾好，仲新裝修過，而樓下飲食購物應有盡有。所以有時筆者都覺得，香港人對住新樓的情意結，應該都唔可以用正常人思維去理解。
=============================================
