【樓市贏家】新盤收票越來越少 爆破先兆?(徐峰)
都話樓市兩極化情況越來越嚴重,一方面,山頂(實際上應該叫東半山)分層樓王呎價更超過13萬元,足足比舊紀錄高兩成半,震驚市場,但另一方面,近期推出的四大中小型樓盤,收飛情況卻強差人意,就算是新地推出的南昌站匯璽II,5日收唔夠2000票,比起第一期開賣前7日狂收超過萬三票,可謂天淵之別。
或者你會覺得,收多少票不大重要,賣到樓就可以,但某程度上,收票多少都會反映銷情,上述的匯璽II未正式開售,未知實際銷情如何,筆者先以宏安推售的薈蕎做比較。同樣由宏安推出的馬鞍山薈朗、薈晴,分別在2016年8月及10月開售,薈朗入場價277萬、首批平均1.33萬,比當時同區二手賣貴兩成,但開賣前勁收3500飛,一個星期賣出450伙,氣勢如虹,到10月推出薈晴,首批呎價已加到1.48萬,比薈朗貴超過一成,但銷情同樣熾熱。
不過,到今年,宏安推出大圍薈蕎,首批平均呎價超過1.8萬,252呎入場費要428萬,令筆者驚嘆一句:傻的嗎?當然,買家並不是傻的,項目最終收唔夠700飛,而首日開賣的105伙,最終亦只賣得出約一半,結果完全反映出,細價樓始終都是用家為主導,即使有「父幹」,或者任你把單位劏到再細,用家就是要計承受能力,所以都有些行內人預期,細價樓見頂的機會,絕對比豪宅為大。
講返市場上現正推售的幾個新盤,雖然匯璽II首批單價都比第一期貴約一成,但始終隔離幅地王呎價都達1.75萬,可能都「托得住」,但新世界西營盤瑧蓺(其實如果唔計亂撞或者上網搵,有幾多個人真正識讀呢個名?),雖然有港鐵優勢,又是市場熱捧的迷你單位,但200幾呎開放式定價過千萬,又係咩概念呢?有錢人任性用12億買層唔夠1萬呎的「樓王」,都仲明白,仲200呎開放式的死窮鬼又何來1000萬買樓呢?結果就是收極都得百幾票,藝術家!祝你好運!