雅虎香港財經 【樓市贏家】賣完樓才刻薄代理 邊個發展商撳住搶？（徐峰）
正當樓市靜了幾個月，個個代理等緊飯開，信和推個觀塘大盤凱滙出來，人人以為終於可以過一個肥年，點不知，發展商在樓盤賣出接近1400個單位後才向代理公布，整個樓盤無論任何戶型，都只係得1.7%佣金，搞到班代理鬼殺咁嘈，其實件事係唔係真係咁衰？
睇翻今次發展商畀的佣金，又真係少得可憐，正常做一單二手成交，買賣雙方各俾1%佣，夾埋即是2%，而一手新盤又要抽籤、又要排隊，推到個客都未必抽到，畀多少少其實好正常，但今次俾得1.7%，比做一單二手成交還要少。
而撇除一些畀到兩成以上、擺明畀你回畀客的樓盤，以往一般大型新盤，佣金都有2.5%到3%以上，一些比較難推的盤或者個別戶型，去到4%到6%都好正路，例如億京的海日灣，劃一就有4%佣，而四叔的君豪峰就劃一5.5%佣，賣得較為差的莊士弦海，開放式單位都有4.5%佣，去到銀碼較大又較難出貨的一、兩房，就去到6%佣金。相對之下，今次信和出手真係好低。
但最最最令到一班代理不滿的地方是，一般大盤都會在開盤首輪銷售時已公布佣金，但係呢，今次信和並無咁做到，而係去到一、二期夾埋的第四輪銷售後，即已經賣出接近1400伙之後，才向代理講佣金比率，咁就有點「撳住嚟搶」、「過橋抽板」的感覺，反正要做的事都已經做得七七八八，畀幾多你都要收啦，所以件事才會咁惹人反感，就好似見工時唔同你講幾錢人工，到做夠一個月差不多出糧時先話你知你連最低工資都無一樣。
其實班代理嘈到拆天，仲用發展商高層改埋圖，其中一個原因是在現時市況之一，不少代理都會向買家回佣，但代理要回佣就是要在買家簽約前已經白紙黑字寫到明回幾多，今次就有部份代理處理回佣時，用2.5%來計算一個回佣比例，一方面令到個客受落，另一方面自己都有合理收入，但發展商忽然公布一個咁低的佣金，變相扣埋回佣之後，自己個收入就大大減少，甚至少到一個他們覺得不合理的地步，失晒預算。其實咁大個發展商，班代理餓足咁耐以為有餐飯食啦，咁都要減人人工，又真係幾慘的。
=============================================
