【樓市贏家】辛苦一世 俾錢買爛樓(徐峰)
有時辛辛苦苦上車為咗咩丫?都係想有個安樂窩,一日辛勞後可有個舒適地方休息吓啫,但如果買到嘅樓有千百樣問題,嗰刻其實都應該幾心痛!
早排筆者有個親戚,30幾歲女,喺屋企人資助吓,加上自己有一筆積蓄,終於一嘗心願花400幾萬上咗車,所買嘅係汀九豪景花園一個低層望海兩房單位,早排已經完成裝修,啱啱呢個星期入咗伙喇。
原本件事好美好,兩小口子經過好幾個月揾樓、搞按揭、搞裝修、買傢私、執屋等等,搞到頭都大埋,終於等到入伙嘅一日,唔使再幫人供樓。
點知,入伙一兩日就遇著落大雨,初頭諗住應該無乜嘢啦,剛剛裝修好,仲叫師傅做晒防漏,之但係喺入伙嘅第二日,窗邊已經開始甩油同起水泡,屋主依家又要發另一場惡夢喇。其實之前裝修緊期間已經發現外牆有少少漏水,但搭好棚後就一直無好天過而整唔到。
雖然呢個屋企嘅發展商以前都出名起漏水樓,有問題可以話係預料之內,但入伙第二日已經甩油,又似乎有點兒那個,所以我成日都話,落大雨先係睇樓好日子。
不過又咁講,你以為剩係舊樓先係咁咩?你真係以為新樓就無事?如果你有留意地產新聞,你就會知道,其實好多新入伙嘅樓盤都好有問題,窗邊露台邊漏水啦,地板唔平啦,洗碗盤底積水等等,咁買樓花可以點避?睇發展商往績自然係一個好重要嘅參考,好似長實咁,啲大盤頭一批係平,但次次入伙驗樓都勁低分,就算幾年樓齡嘅豪宅盤,都敵不過打風落雨,咁買唔買得過就自己諗啦。
當然,有時名牌發展商都有失手時候,好似會德豐同新地,某啲盤交樓時都出現問題,但出事機率較低,所以啲樓都賣貴啲。想要買平嘢定買質素,咁就要睇吓有幾多本錢喇。
=============================================