雅虎香港財經 【樓市贏家】電塔之城 PARK YOHO Milano有乜好？（徐峰）
近排睇報紙地產版，日日見到PARK YOHO Milano新聞，上星期六樓盤開售當日，即時新聞幾乎被Milano洗版，據報當日有成萬人排隊，人龍排到西隧後，但實際上，呢個盤位置吊腳，出入都要搭接駁車，四周更是荒蕪之地，到底有咩吸引力呢？
實際上，每個樓盤都有好有唔好，Milano唔好嘅地方，除咗遠之外，四周亦被電塔包括，仲記得好幾年前第一期峻巒推售時，班記者大佬仲串佢四圍都係巴黎鐵塔。不過呢，項目現樓之後，推出嘅幾期銷情都幾理想，筆者都有去參觀過，個盤嘅會所又靚又大，屋苑又有小型商場，雖然四圍係多電塔，但環境都非常之清幽。
當然，最重要係價錢平，雖然今次Milano比首批呎價比舊年賣嘅Genova貴成兩成，但實際平均呎價都只係萬三蚊左右，觀乎近年市場上嘅的盤，有返咁上下規模，又有新地品牌，都真係好難搵到，從以咪吸引到一班人衝入市囉！
不過又咁講，除咗質素同價錢之外，發展商嘅銷售手法都係好重要嘅，好似Milano咁，細單位入場費400幾萬好易去貨，但大單位要成千幾萬，要去貨唔係咁易，於是呢，新地就一改以往嘅方法，7000幾飛唔分數，一次過報到，當你一個人入兩飛，7000幾飛除二即係3000幾人，但一人買家可能成家人去陪佢，加埋個agent，點會唔出現萬人搶樓嘅情況。
睇返以往歷史，新地都好叻做勢，好似2013年咁，當時賣天璽，大減價之餘又係唔分組，搞到幾千人迫滿售樓處，班有錢佬當然唔like，仲有人兜口兜面鬧樓神，都咪話唔經典。其他發展商又點呢？都係2013年，恒隆賣浪澄灣，40個單位用先到先得形式賣，搞到早一晚已經有代理出理排隊，仲吸引到南亞裔人士受僱代為排隊，場面好亂，搞到要改過玩法先再賣。
=============================================
