雅虎香港財經 【樓市贏家】點捱都買唔到樓 現代小家庭的心酸（徐峰）
現時樓價貴，好多後生家庭都買唔到樓上唔到車，久不久就會有啲老一輩嘅成功人士，或者離地富二代走出來，同班你哋班平民講，要積極返工、要努力儲錢，唔好出街唔好去旅行等等等等，咁就有機會買到樓，仲話佢哋後生時都係捱得好辛苦，之但係，佢哋又有無諗過，現時成個社會同幾十年前有何不同？以前嗰套依家又行唔行得通？
講真，筆者都唔係一個大富之家出身，就連小康之家都稱不上，還記得小時候家境唔係咁好，阿爸阿媽為咗供樓，公一份婆一份，筆者就獨留家中自己顧自己，雖然兩者唔算賺得多，但兩份收入三份人使，加上那個年代做小朋友都唔會有太多好貴嘅活動，生活都算過得去。
但依家呢？你想公一份婆一份，你會唔會想得太美好？首先，依家呢個年代，如果你俾人知你獨留兒童在家，你唔俾人告都俾人擺上網公審啦，唔想咁樣？唯有請個姐姐幫你湊仔，請個姐姐4、5000蚊一個月，但又多個人食，仲要以前啲姐姐瞓梳化都得，依家又話要有房，即係間屋都要大啲先請到姐姐，又係錢。
再者，以前返份白領工，朝9晚5準時收工，依家？你想收5點？你發夢嗎？一個寫字樓除咗老闆之外，相信就只係reception姐姐一個人可以。遲收工對供樓有幾大影響先？你諗下，以前個個可以收工去買餸返去煮飯，幾十蚊餸夠你一家三口晚餐再加第二日帶飯，依家夜收工焗住出街食，去茶記食個碟頭飯都5、60蚊啦，錢去哪？食都食咗一大截。
仲有仲有，以前細個讀書，幼稚園幾舊水一個月，九年免費教育就免費的，有課外活動都只係bonus，依家呢？未返幾千蚊一個月嘅幼稚園已俾唔知幾多錢返學前班、playgroup，講到唔上好似無書讀咁，跟住以前有錢人家學鋼琴等等，依家好似係必需咁，仲要去求其一個屋村補習社都收二、三千一個月，政府免費俾你有鬼用咩！講到依家，筆者除咗想講老一輩嘅人未必體會到依家小家庭嘅辛酸之餘，亦都想講，無錢又想學人買樓？咁你千萬唔好生仔！
=============================================
