【水能覆舟】等，一個合作機會（渾水）

我跟拍檔周不時會見不同潛在的合作伙伴，看看有無商機。跟潛在的合作伙伴吹水，係一個互相摸索和了解的階段。如何把自己做緊的東西和優勢有技巧地講出來，係一種藝術。講太多，怕比人知太多；講太少，又怕比人覺得無料到。

有一次，合作伙伴一股腦兒把自己所有的計劃講了出來，剛好有一些計劃涉及我和拍檔的專業。聽完合作伙伴解說一次之後，我和拍檔心意相通，都知道不可行，可惜合作伙伴又雄心壯志，覺得一定掂。拍檔性格比我急進，旁敲側擊地推銷我們的項目，希望合作伙伴不要自己搞，跟我們合作，當然合作伙伴聽不入耳。

趁合作伙伴去洗手間時，拍檔問我意見。

我很簡單地講幾句：「佢要死，你無可能唔比佢去死。三個月後，等佢走到瓶頸，我再搵返佢，佢就會有興趣找我地合作，到時才有商機，而家要守株待兔。」拍檔有恍然大誤的感覺。

「唔比佢去死」係一個黑心的講法，比較好聽的講法叫「忠言逆言」。當一個人心太雄，你很難去勸佢聽不合耳的意見，尤其是我跟拍檔都比較年輕，合作伙伴不會認真看待。講完反而仲傷害關係，所以倒不如放長線，等一等，那還比較好。

等，係一種藝術，也是順著自己性格而行。我跟拍檔的合作，也是等其生意模式有雛型，我才自動投身。等，也是我投資風格，所以我贏錢贏得慢，常跟大市不同步。調翻轉，有一類人則喜歡收割，過橋抽板，我個人是幾怕跟呢類人合作。