香港股市 已收市

【熱話】的士大哥因為生意唔好 偷偷飲泣

如果有個的士佬,喺你面前飲泣,你會有咩想同佢講?

的士佬日日聽盡天下乘客嘅故事,但自己背後嘅辛酸史,又有誰人願意聆聽?有剛剛由裝修轉行揸的士半年嘅的士大哥在社交平台開帖講,自己做裝修搵唔到食,於是轉行揸的士,但因為呢兩日生意好差,終於忍唔住喺架的士入面,流下男兒淚。 

兩行眼淚背後,究竟係因為窮?定因爲太有責任?唔少行內人都忍唔住企出來拆解加安慰: 

1.揸的士養家有壓力

好多人都話,做得早更司機,過半數人都係仔大女大,只係想搵啲零用錢,過吓日辰,工作相當輕鬆,即使被扣10分仍然無壓力,停牌當放假。所以早更唔缺司機,因為有大量退休人士入行,包括退休公務員。但如果做的士司機,係為咗養活一家人,真係幾大壓力,家庭經濟支柱尤甚呀! 更隨時愈做愈窮。

2.因為太有原則,無做85折的

行家問,有無加入85折的呀?有冇裝日app呀?有冇裝乜的物的呀?有冇同盟派job俾你呀?sorry呀,啲長途客都去晒85,如果的士佬堅持原因,唔踩界做犯法嘢,梗係少生意啦。或者你睇吓Uber加價後,係咪真係多人坐咗的士,就算係,咁究竟有幾多客入到你袋? 

3.因為太新手、無經驗

新手起碼三個月以上先開始知邊度多客,多啲認下路,認下地方,對自己有好處。同時轆多啲街,唔好成日走去排隊,尤其是你唔係退休阿伯,唔好見人排你又走去排,不如操弗啲手車去轆街,生意一定好過你排隊,尤其啲過海站,起碼排你半粒鐘,仲未計隧道口塞車的時間。 

4.因為睇唔開

唔好計較一兩日生意,每個月收入基本上都差不多。每個月都有幾日特別差,亦有幾日特別好。 不如諗吓其實揸的士已經係世界上最自由和最簡單工作。好似早更「綠的」,每星期開六日,每日10.5小時由朝早5:30至下晝4:00,以大學站的士站做基地,客人去邊都接,長短途無所謂,落客後,除非馬上有客上車,或路過有客截車,否則馬上返回大學站再排隊。單係呢種經營方式,幾乎唔使用腦,每月平均穩定有兩萬淨收入。 

所以唔好再背人垂淚,抹乾眼淚做個佛系的士佬,緣份到了,自然有長途客,咁咪幾好! 

來源:的士司機資訊網facebook

【相關搜尋】的士佬為千三蚊反被呃五百

===================

19網輕鬆爆料熱線,歡迎舉報老細同事19惡行,立即click入去講畀我哋知啦