香港股市 已收市

【理財研究】月供股票入門(開戶篇)

樓未供得起又想儲錢,大家可能會選擇從月供股票入手。一如打邊先要有爐,要月供股票第一步係先開戶,揀邊間銀行或證券行,既要考慮自己需要亦要留心月供股票計劃的賣點。

毋須儲買股「首期」

置業最難係儲首期,買股票亦不例外,由於買股票係以一手為單位,以領展為例,一手500股,現價計買一手要四萬五,即使每月儲到兩千,都要捱一年零八個半月才上到車,如果期間領展股價繼續升,儲蓄期更可能要加時。

改用月供計劃,好處係毋須儲買一手資本,用一千元起動,月供計劃就幫你買碎股,讓你即時成為心儀股份的股東,「有嘢揸手」執行月供計劃就更有行動力。

另一好處係平均成本,即使你不幸地在騰訊四百多元時起動月供計劃,但期間騰訊曾跌穿三百元,近來又穩守350元水平,拉勻來計,你入貨成本都肯定較四百幾元買一手的投資者平得多。假如你選擇長線供派息穩定股份,收到的股息亦有助拉低平均入貨成本。

選擇月供計劃 留意靈活度及「甜頭」

如果你天生有麻煩恐懼症,最怕同時要處理唔同銀行或證券行戶口,而剛巧出糧戶口的銀行有提供月供股票計劃,咁就毋須多想,照用出糧戶口銀行的月供股票計劃。但若然你唔介意「照顧」多一個另一間銀行或證券行的月供股票計劃,就不妨考慮一下計劃的靈活度及「甜頭」,讓月供股票變得更抵玩。

所謂靈活度,最重要係睇計劃是否容許隨時轉換月供股票或調整組合,另外係沽出碎股的成本,例如中銀香港月供股票計劃就以市價沽出碎股為賣點,想沽售儲蓄股票時,即使有碎股都唔怕賣價唔貼市。

至於「甜頭」,雖然月供股票每月只係出擊一次,但市場上月供股票計劃佣金最平都要50元,一年就要600元,所以提供免佣優惠的滙豐,以及頭六個月免交易費的招商永隆都有一定吸引力。

喜歡鑽研信用卡賺分的朋友,又想透過月供股票賺分,則可以考慮中銀香港及交通銀行的月供股票計劃,兩間銀行的月供股票計劃都設有信用卡扣數供款兼賺分優惠,當然唔想賺分蝕息,你就要嚴守月月清卡數原則了。

至於月供美股,除了可選擇寶盛的月供美股計劃,你亦可以考慮開個網上美股交易戶口由自己每月操盤,皆因美股優勢係可以逐股買,換言之自己出手都可以買碎股,同樣以每月一千或二千為目標,出手一、兩次就可以幫自己儲股票,長遠計更可以慳唔少交易費用。