【異動尋寶】三隻撈底股的查詢（魏力）

散戶普遍鍾意買平嘢，見減價貨就會想衝埋一份，近排魏力收到最多的撈底查詢有三隻：金斯端（1548）、鴻騰（6088）、丘鈦科技（1478）。三者股價看似「跳樓大平賣」，但如果由近期升浪的起步位計，仲有大把水位可以落，想展示身手去接飛刀，魏力也無法阻止，只能祝閣下好運了。

恒指突破兩萬八後出現技術性「後抽」，成交縮減，板塊繼續輪動炒作，等美聯儲議息結果，正常過正常，咁都要驚的話，實在好難在市場搵食。尤有甚者，連做一個決定的能力都欠奉：「升咗喎，追？」「跌穿你建議買入位喎，等？」「你推兩隻喎，點揀？」魏力相信，就算係一個收錢服務你的人，都會招架唔住。唔識，絕對可以問，但以上的問題，只係反映問者完全無動過腦筋，一味等餵免費餐，但有無想過，世上是否真的有免費仲要有人餵埋的午餐？

券商股兩大催化劑

另外要澄清一點，魏力選股的原則是：有基本因素、而股價催化劑正在發酵的股份，務求食一個浪，再當調，係食一個浪；博一棍半棍、博三兩格嗰啲，並不在選股範圍，以爬格仔為生的朋友，本欄應難以符合閣下的期望，還請稍移玉步參考其他專欄的意見。目前股市大方向仍是睇上，騰訊（700）率先破頂，滙控（005）都開始突破，相信中資金融股會跟隨其後，加上A股已形成升勢，「兩融」（融資、融券）餘額再次逼近1萬億人民幣，創19個月新高，氣氛轉旺之下，對券商股十分有利。

睇番內地券商股走勢，週一（18日）多隻低位崛起第一支大陽燭，原因除了兩融急升外，更有最低佣金制度的傳聞助燃，催化劑正在形成，屬寧買當頭起的格局。及至昨日A股向下，券商股出現回吐相當合理，如果連一個小調整也捱不了，一丁點信念也沒有的話，只會捱打兼洩氣。以買入價設定一個10%至12%的止蝕位，hit到就走，未到就繼續持有，實在並非困難的事。炒股總有風險，要冒了險（落注）才能賺錢，如不能承受這種壓力，只有擺銀行做定存先幫到你。

www.facebook.com/2012jason