雅虎香港財經 【異動尋寶】極速挾倉有玄機（魏力）
恒指第四季出閘大跌600幾點後，昨日大低開286點殺熊後極速反彈，一度倒升144點，但未食午飯已經眼瞓無力，埋單仍跌35點。值得留意係成交額，高低波幅超過400點，但成交都係靜蠅蠅，得674億銀，午後魏力索性熄機休息，無眼睇！
成交大縮水，最直接解釋當然係「大媽」坐困愁城無得沽，莫非下週港股又要捱多浸盤沽？Anyway，冧市一日後，市場極速回復平靜，相當罕見。樂觀派取態自然係「淡友沽無可沽，係反彈先兆！」但悲觀派就會話：「成交咁疏好友都無力反撲，市底咁差，後市要再踩多腳！」你又企邊面？定一早已經在觀眾席食花生？
魏力的睇法是咁的：國慶長假之下，本週是外資任舞的時間，大gap down明顯係為咗殺熊，食完肥熊就用最快速度拉高補gap，手法猶如好友挾淡倉，閃電式挾倉有兩個意義：一、最少人追到貨；二、最少沽盤阻街，自然一推就上。挾完倉又點呢？大戶又可以較高價位再派過，食第二浸。以昨日恒指為例，大戶由day low推到day high，不過花了一小時，但10點半後到收市（4.5小時），就是派發時間。
「咁搞法，後市咪好凶險？」聽埋我講先。美國加息、外資沽貨撤離是事實，但北水大媽的「走資」需要仍在，特別是大陸經濟轉差、人仔隨時再貶值之下，港股通仍然是北水南下合法避難的途徑。今年來大媽買得最多就係工行（1398）同滙控（005），無非都係求穩、收息保本就於願足矣。所以，若然閣下仍執意要逆市買股，還是跟大媽最穩當！
筆者為證監會持牌人，未持有上述股份權益。
