【異動尋寶】沽空機構「改邪歸正」?(魏力)
個市再衝二萬六,今年累計升18%,睇開好易搵食, 加埋北水不斷湧港,正路應該會吸引唔少新錢落場, 點解個市成交唔升?究其原因,散戶多數炒二三線、細價股, 刀仔鋸大樹,而今年個玩法剛好倒轉,主力炒大股。「大股」 有兩個含意:大市值、股價大。吉利(175)、恒大(3333) 煲到你唔信;偉易達(303)、ASM(522) 幾十蚊炒到百幾蚊,明顯芬佬主導。
散戶比較鍾意參與的科技股,近期多隻被狙擊, 加上高位批股減持不在少數,導致經常火燒連環船, 又嚇走一大批散戶,就連平日鍾意坐股票的魏力,近排都要玩短線, 三兩日就了結,皆因市寬甚差,幾乎日日都6成股票跌, 揸多幾隻總有隻中伏,拉低整體回報。
渾水舵手Carson Block在彭博事先張揚,今日會發炮攻擊一隻港股, 齋出口術已經推冧幾隻「疑似」獵物,仲搞到科技股午後出現小型「 火燒連環船」,可見市場信心有幾弱!越多這種沽空攻勢, 將令更多資金投向指數基金懷抱,特別是回歸廿週年, 就算維穩都係頂住個指數,炒指數股以外,很大機會吃力不討好。
執筆之時,停牌多時的瑞聲科技(2018)公佈5點半開記招, 澄清沽空機構葛咸城的指控,未知是否意味今日可以復牌? 花生指數更爆燈的消息是,葛咸城同行Anonymous Analytics竟然出報名唱好瑞聲,仲要畀埋目標價111元 ,即係話瑞聲可以去番沽空前的價位,莫非係幫瑞聲復牌造勢? 此外,報告更大字標題「Hong Kong Deserves a Better Hero」,明串「蝙蝠俠」呢位英雄,沽空機構大戰, 今日隨時爆發!