【異動尋寶】睇業績搵股炒 留意兩件事(魏力)
股價係反映前景,而唔係歷史。上半年業績係歷史,理論上已大致反映在股價,業績後股價應聲抽上,多半為短線波動,屬於感性多於理性,這個時候衝入去,以為有金執,但最後多數係接火棒。
又到公司派成績表的時間,長和(001)、恒生(011)、中電(002)、銀娛(027)、港交所(388),業績一開都算不錯,至少給人的感覺是:之前跌咗幾個月,好似跌過龍喎!所以出完個價都識彈。不過,分析業績時,有兩點要注意:
一、市場主題仍然是避險、避險同避險!魏力預期,今次業績期升得最勁、最持久的股份,就係派息有驚喜嗰堆。無他,要在非常不確定的市場中尋找確定性,派息係最簡單直接,但炒這類股份的方法,係業績一開就鬥快買上去,之後在除息前沽出,賺差價,而唔會坐到除淨之後。買股票收息,千祈唔好抱做定存的心態,除完息,個價係會調整番,其實你無多賺一毫子。
二、股價係反映前景,而唔係歷史。上半年業績係歷史,理論上已大致反映在股價,業績後股價應聲抽上,多半為短線波動,屬於感性多於理性,這個時候衝入去,以為有金執,但最後多數係接火棒,特別是前景受內地消費市道影響的濠賭股,以及受成交乾塘影響收入的港交所。
至於長和、恒生、中電,三者後市會比較理想,主因派息好,同時業績有增長,有條件「財息兼收」,因此會是穩陣派的理想選擇。
其他板塊方面,之前6月份新書發佈會時,已提到燃氣、風電股受惠行業前景好轉,受貿易戰的影響也甚微,股價仍有不俗的潛力。至於醫藥、教育、物管三板塊,近期表現跑輸大市,主因估值過高,而非增長動力減弱,調整過後仍可睇高一線。
筆者為證監會持牌人,未持有上述股份權益。
www.facebook.com/2012jason