雅虎香港財經 【異動尋寶】等反彈先減持得唔得？（魏力）
港元拆息抽升，個市再試底，恒指低見28098，比上週四的28094只係高4點。表面上睇，守得住之前個底，情況唔算好危，但值得留意，恒指昨日收市價28154，已比上週四收市28159為低，仲要最尾競價先打穿，感覺絕不良好。操作上宜將倉位降至一半或以下，以防跌勢轉急。
跌市當前，收到不少粉絲inbox查詢，大部份是問撈底，看來對後市仍是頗有信心，但魏力操作向來睇趨勢，目前個市逐級下移，買貨（特別是去撈剛剛熱炒完回落的股份）是逆勢而行之舉，個人絕不建議，因為股價剛開始轆落山，點知幾時先到底？貿然去接十分危險。
舉個例，7個交易日之前，喪炒5G概念的中興通訊（763）仍在30蚊樓上，蓄勢再創新高，豈料到昨日一度24蚊都穿埋，一星期多少少已唔見兩成，如早幾日逆勢衝入場又不嚴守止蝕，真係輸到入肉。
「家陣先減倉，轉頭又反彈咪好蝕章？等彈高一點先減得唔得？」呢個問題，魏力不知被問過多少遍。其實驚蝕底十分正常，打完靶即彈，感覺分分鐘慘過畀人銡一刀。不如魏力用個故事作比喻：從前有位農夫，在樹下放了一個籠，籠內放了食物做餌，準備引雞入籠進食，之後一落閘就成為農夫囊中物了。
計劃一切順利，籠內已共有8隻雞，但農夫心想，不如多等一會兒，等夠十隻先落閘，咁就十全十美了。可惜事與願違，沒有雞再「落搭」了，反而籠內的雞食飽飽之後，有兩隻率先離開籠子。農夫心感不妙，但覺得現在落閘又唔抵，得番6隻雞，「如果有一隻再返入個籠，我就落閘了。」結果，沒有「回頭雞」，籠內又有兩隻雞徐徐離去，籠內得番4隻。農夫非常失望，「只要4隻雞有1隻返入籠，我就心滿意足了！」結果，最後農夫空手而回，白忙了一個下午。
聽完這個故事，相信各位也明白魏力意思了。
