【股壇衝鋒車】打新股的藝術（周沖）

大市開始因為國內放長假放軟手腳，周沖都將大部分資金由炒作去左之前的眾安在線（6060）。其實打新股都係一門大生意，只係大部分人會諗要借成幾百萬什至幾千萬去抽好大風險，但其實只要你停下來諗一諗就知件事並唔係咁。用眾安為例，做頂飛3億幾其實中貨都只係有兩百萬到。周沖個經紀就大部分時間都係幫客留意做新股事宜，佢話只要係超到100倍基本上都中唔到太大手貨，而做十隻黎講都只有一隻半隻會輸，所以基本上來做同一舊錢來抽一年百分之二三十的回報率也不太難。

言歸正傳，點解無啦啦同大家講新股，就係因為假期後突然有九隻新股同時招股，8隻創仔一隻主板。周沖最鍾意呢類時間，而周沖的策略就係冷門的會搏大霧抽幾手放係度，熱門而有概念的（即係預計超額過百倍）就會入大飛抽獎，搏一開升幾成至一倍。

可能你會問創仔都無市場，點解重要抽？留意番早幾個月上市的有幾多隻升左幾倍？ 萬成金屬（08291 ）、瑞強集團（08427）、靖洋集團（08257）等都係靜靜起革命，所以一籃子小注買呢類股份等半年分分鐘有驚喜。

講咁耐，咁呢轉應該抽邊隻？周沖呢個星期都同戰友分析過，大注應該抽有支付概念的高萌科技（8065）。因為在首日見到輝立只有5成孖展的情況下都有13倍，加上經紀做果間行都有大戶落飛、潛力應不簡單。而冷吼的應該係呢期唯一主板的2337 (眾安能源），及保薦人表現不錯的8476（大洋環球）。

周沖
chowchung123@yahoo.com.hk
http://www.facebook.com/chowchung123