【股壇衝鋒車】殼股升值 翻叮連達（周沖）

上周五美股上演先跌200幾點後倒升200點的絕地大反彈，帶動港股周一上升248點至21854點，由於本周四A股才假後重開，預期港股此前有機會上試22000點大關。大盤靠穩，中資股及細價股又各自各精彩，包括周沖上周推介的星光集團(403)及A8(800)，均較推介時上升逾10%，今日繼續走細價股路線，現金牛連達科技(889)又係翻叮之時。

周沖假期時與做買賣殼股的朋友傾偈，朋友大吟苦水，說早前市況雖好爛，惟殼股市場卻持續火爆，主板最近殼價已升至6億入場費，創業板殼更係奇貨可居，只有期貨賣，認真誇張。說穿了，就係內地暫停IPO，令更多的內地公司選擇來港買殼繼而集資。周沖之前推介星光集團，就係由殼股角度出發，而連達科技比星光的條件更筍，係不折不扣的超靚殼。

首先，連達最近市值4.19億元，截至6月底止持淨現金4.61億元，若以殼價6億加手上現金推算，公司最平市值都有10至11億元，現價1.32元可算半價大平賣，升上NAV(2.26元)水平絕不過份。

其次，除左殼靚爆，連達主業也見得人，上半年盈利勁升72%至1257萬元，預期下半年可保持強勢，現價的2014年市盈率僅12.9倍及息率3.4厘，因此2015年市盈率有機會降至單位數字，息率則相信可保持至3至4厘水平。

連達擁有最重要的殼股必殺技，就係貨源極度歸邊，年逾70的大股東蕭保羅持股72.28%，佢一旦肯賣，相信準買家即時可集中貨源，對於日後的炒高或抽水皆得心應手。

蕭保羅今年曾兩度出手增持公司股權，分別係2元及1.20元，雖然數量只有10餘萬股，主因係此股街貨極疏，要買貨需極度耐性。周沖建議可先雞仔注買入，待有異動時再加注。