【金錢逆經】證監成被告涉2.8億（杜柏森）

前事不忘，後事之師；想買到的股票又平又正，其實並不困難，只要懂得等待時機就得；因為香港證監會幫你。只要外圍晚上有一個急跌浪，次日就會在中午收市前，湧現不少又平又正股票任你買；當日能受益的股民就要記得多謝香港證監。近年香港的證監好叻做臉子工程，特別係對D弱者。見到夜期急跌，次日證監部門的神經敏感幫，就會晨早要求全港証券行交出有潛在風險的「孖展」問題戶口清單，証券行被迫將那些本來無需斬倉的五、五波戶口都殺掉，結果就出現執平貨的「絕情11點半」驚人場面。這隻無能之手美其名話加強監管，實質係唔害你已經要偷笑，還年年要加「筆直」，直情當和市民係傻仔。最近仲話要加監管上市權，攪到成班券商齊心反對；話時話，張華峰大哥好野，真係好耐無見過業界敢齊心啦！如果比證監今次成功加權，肯定係香港股市的悲劇開始。

 

成班拜鬼的監管人員應管不了，欺善怕惡，好似德普科技(3823)和中國天然氣(931)比人惡性沽空，他們對沽空者「粒聲都無」，但對受害的上市公司，就「噸正個款」，向公司問話，要求寫報告解釋；這樣的管治行為是赤裸裸的等同鼓勵沽空者追擊上市公司。不單沒有救市，仲要加多一腳，幫你快點斷氣。相比之下的照顧，香港股民就不及內地股民幸福，監管機構出到國家級單位追查沽空原兇。

 

 

中國天然氣大股東「簡Sir」為左對抗呢批惡性沽空者，日日高調用真金白銀買貨，對小股東有哂交代，但證監好似真係盲左喎，乜都睇唔到，聽唔到，無做好本份，還要攪爭權。近日撐簡Sir的一班好友睇唔過眼，傳聞有意成立救市基金，專門對抗惡性沽空「鬼盤」。如果搞到香港股市好似菲律賓要行私刑維權，真係醜到唔知點講啦。另外，有單仲勁料，就係上月有一個自稱受害人叫王談意，親身入稟高院告證監(HCA2822/2016) ，提到HCCL 34/2013案件，要求2.8億賠償，不管結果如何，相信都可以寫入記錄。一個監管部門，搞到如斯田地，官司纔身，真係醜到貼地；不過，鬼係唔知醜的。所以梁特首，你唔係鬼，不過你被鬼玩，導致你失民心，撐你連任人數大幅減少，係有理由架！單係我和過佰萬股民已經對你有意見啦，希望新主上場，可以好好治下呢個部門。