雅虎香港財經 【雯女？黎姿？】被當透明 佘詩曼自爆台慶頒獎禮遭對手白眼
佘詩曼，97年港姐季軍，兩奪無綫頒獎禮視后，分別是2006年《鳳凰四重奏》及2014年《使徒行者》。「豬肉獎」有三個，其中兩個分別是《鳳凰》及《使徒》，豬肉中之豬肉，係2010年《公主嫁到》。那年視后係鄧萃雯《義海豪情》。
佘詩曼最近成為《魯豫有約一日行》嘉賓，宣傳片亦出咗。長逾六分鐘嘅片段中，阿佘分別談到接拍《延禧攻略》嘅心路歷程，以及台慶頒獎禮風波。
依家身價已經唔同晒嘅阿佘，喺大陸都吃得開，無綫小小頒獎禮，算是錦上添花。依家講番以前爭獎風波，雲淡風輕，但當時——2010年，阿佘《公主嫁到》敗於四奶奶手下失落視后，曾有傳係佢離開無綫外闖主要原因。這是後話，另文再述。
講番《魯豫有約一日行》。魯豫問阿佘，究竟同其他花旦競爭，係咪嗰種重則頭破血流輕則嘴藐藐眼高於頂咁戲劇化？阿佘笑：「可能同在一個公司，你同一年競爭同一個獎，那當然會有那些感覺。就算我跟你沒有，那報紙甚麼報道全部都會寫，我跟你競爭，你跟她競爭，誰誰誰誰。」佢笑謂一次被鏡頭捕捉到佢斜眼望天嗰一下，一臉不屑，阿佘解釋當時佢只係斜眼望下自己個瀏海。
是真是假自行判斷，阿佘分享了一個故事。一年台慶，阿佘同佢個對手一齊企，等開場。阿佘聲稱當時佢見到前面發生咗一樣好好笑嘅嘢，於是佢就擰轉頭同佢對手講：「嘩，你睇！」但對手完全唔理佢，直頭當阿佘透明一樣，木然不動。
鏡頭前嘅阿佘，做番當日嗰位對手嘅「木臉」表情，阿佘話當時都忍唔住睥（純眼神交代）咗對方一眼……
魯豫問阿佘究竟對手當時係故意唔理佢、定係緊張到冇暇顧及其他？阿佘話：「我不知道。」
