【魚樂無窮】自己倉位自己負責（唐牛）

股票市場千變萬化，每人有自己一套炒股心法，實在理所當然。正如入到茶餐廳，粥粉麵飯樣樣有，你鍾意咖喱雞飯凍奶茶，我鍾意乾炒牛河熱檸水一樣。不過，炒股唔同食飯，今餐味道唔好，最多下次叫過另一款，炒股講緊真金白銀，輸咗係心痛兼肉痛，極端例子隨時飯都冇得開，唔係好又一餐唔好又一餐咁簡單。

有跟開我在不同財經平台嘅戰友都知道，本人最愛在通告中尋寶，入場後每日也定必芒實聯交所披露易網站，遇有好壞消息爆出，也可即時作出反應。一年大大話話炒幾十隻股票，實在難以在各媒體定期跟進推介，歡迎戰友們在fb主動查詢之餘，其實更希望大家善用披露易，自行尋找公司的update，並作出適當部署，始終自己倉位自己負責，一手資料永遠最有用。更理想當然係互相交流及提點，相信一加一威力遠大於二。

億和（838）係其中一隻在通告堆發掘的股票，睇中佢緣於再次出現必勝方程式——發option加回購，本月初起由1.1元水平開始回購，帶動股價不足一個月最多升近兩成，近日稍作回吐，正是回購停止了。思前想後，原因只得兩個，第一，公司不希望以偏高價錢回購，第二，公司或有新動作。事實上，中期業績突飛猛進，盈利大增2.3倍至7,539萬元，較去年全年還要多，今年盈喜肯定冇走雞，會唔會係呢個原因要停手？要用時間去驗證。

唐牛fb專頁

http://www.fb.com/tongcow88