【King 談樓市】樓景就係最好景（King Sir）

樓景就係最好景

筆者近月為大台的財經資訊台拍攝了一個睇樓節目，我會帶地產投資班學員到全港各區「搵筍盤」。節目裏，每次筆者都會客觀地對該樓盤評頭品足一番，說出該盤的長處和缺點。最近一集就介紹了一個位於九龍站的半新盤Grand Austin、面向佐敦舊區低層的兩房單位。因為位於低層，所以景觀都係以樓景為主。錄影時，筆者就話「四面環樓」景其實就係全屋最大嘅優點。

節目出街後，我收到很多觀眾查詢，問我點解唔係海景、開揚景最好咩，樓景都算係優點？

買樓因應不同目的

作為一個資深投資者，筆者在過去廿多年裏真係「閱樓無數」，無論海景、山樓、街景、垃圾房景、甚至墳景，噏得出嘅景我都睇過哂，各有其優劣，分別只是在於閣下買樓的目的，目的不同，就要用不同的角度去衡量其價值和利弊。

如你是一個用家，你鍾情海景而又畀得起錢的話，一望無際的海景必定是你的首選。當然海景單位、尤其是在市區的，價值肯定不菲。大家要明白，自用是主觀的，沒有對或錯，只有喜歡不喜歡。很多人覺得近日有個新樓盤擁維港璀璨海景，但買成五六萬蚊呎絕對不值，但其實只要你鍾意又俾得起的話，你覺得值就已經足夠了。不過喜歡買海景單位的人必須留意，就是除非你買維港海旁或山頂，否則全港所有住宅單位大部分的海景都不是百分百有保證的。

以往的例子有西半山，三條道路︰干德道、羅便臣道和堅道，由上而下依山而建。四五十年前三條街道大多是唐樓或十多層高的單幢洋樓，河水不犯井水，互不遮擋對方的景觀，但隨着愈來愈多收購重建，原本住在干德道擁有無敵海景的，一下子就被前方羅便臣道的四五十層高的新樓盤遮擋。正所謂「剃人頭者人亦剃之」，在羅便臣道的亦會被前方堅道新建的住宅遮擋。

永久的樓景或內園景

而較近期的例子有東涌，原本坐擁無敵機場靚海景的映灣園，自從臨海新盤東環及昇薈落成後，屋苑中、低層單位的海景就被大部分削去。

隨着未來東涌北大幅填海擴展起樓，填海部分就在東環的前方，其海景單位景觀估計將被遮擋。明明用海景的價錢來買，點知最後換來「對望樓景」，物業價值一定會大打折扣。

其實，在市區舊區及新發展區，前面隨時起幢新樓遮住你，今天的靚海景、開揚景，明日隨時變成面壁樓景，景觀係無Guarantee保證的。

因此，筆者在投資上（自用除外）從不喜歡買海景單位，亦不會為一個開揚景而付一個特別高的價錢。相反，我更喜歡買一些樓景或內園景，因為這些單位的景觀將是永久的。我所付出的，買到我所應得的，總好過你現在以高價買入海景或開揚景，未來卻可能變成樓景，物業價值除時貶值兩三成。

作者：King Sir

香港按揭轉介創辦人兼資深物業投資者。2004年拿著60萬買樓，至今已擁有過億物業，早達財務自由。現為香港電台《e線金融網King Sir會客室》主持，亦是香港大學專業進修學院物業投資課程總監，希望透過不同渠道與年輕人分享買樓心得。本欄所得稿費，全數捐贈無國界醫生。（本欄隔周刊出）