不和搞對立 講明「唔夾」 方力申買蛋糕向陳瀅賠罪

陳瀅與方力申傳不和，兩人親自解畫。

藝人陳瀅與方力申（小方）被傳不和，昨日他們出席宣傳活動，回應記者提問時表現「對立」，小方笑言要買蛋糕「氹番」陳瀅。談到與劉佩玥及陳曉華的泳裝照曝光，陳瀅預告收視好會陸續有來！

陳瀅、蔣家旻及小方等昨午出席無綫劇集《美麗戰場》宣傳活動，席間眾人推出蛋糕為本月22日生日的陳瀅提前慶祝，壽星女笑指願望是嫁得出！受訪時被問到是否恨嫁，她坦言：「唔抗拒，婚後都會繼續工作。」小方在活動上被指會最快閃婚，但他斷言不會：「啲人結婚點解要搵好日子？因為結完婚就冇好日子過！」陳瀅即「回敬」：「我又唔覺得，反而覺得結婚係好事，所以我哋咁唔夾。」提到小方之前指要求陳瀅對戲，但女方以補妝為由拒絕，因而傳出不和，陳瀅無奈回應：「係佢講埋啲唔好笑嘅嘢引起啫！」小方說：「大家睇呢套劇睇得太投入，現實中我哋唔係咁，之後要買蛋糕同佢賠罪添。」

水着相谷收視

提到同劇的劉佩玥在社交網上載與陳瀅及陳曉華的泳照，陳瀅說：「當時小方同朱晨麗喺總統套房中拍親熱戲，我哋3個趁機喺泳池影相。如果收視好，我哋會甫啲沙灘相出嚟。」原來她今次有份唱劇集片尾曲，她笑言只此一次兼期間限定，又大爆結局不是Happy Ending。

蔣家旻表示近日收到表哥的留言，與網民一樣指她太奸，她預告會由頭奸到尾：「初時好開心，後嚟有啲負面情緒，啲人以為我真人都係咁奸，有冇搞錯？（因為壓力太大睇中醫？）冇！我向來有定時睇中醫調理身體。」問到今次會否有信心爭獎？她指一切隨緣，但希望能夠入圍「女配角」及「最喜愛角色」5強。

另外，前晚播出的一集交代陳曉華捉姦在床，卻被男友丁子朗狂掌摑。對此，陳曉華說：「拍攝時硬食咗丁丁（丁子朗）十幾巴，拍完要敷冰。我都係拍劇以來首次畀人怒摑，拍到我情緒激動，成個人好熱。Cut機後工作人員發現我塊臉腫咗，丁丁就第一時間擁抱我同問候，好窩心。」丁子朗亦自言是首次打女人，很擔心傷到對方。

陳瀅獲眾人送上蛋糕預祝生日。

劉佩玥、陳瀅及陳曉華晒泳裝谷劇。