不要被500呎綁住青春
林鄭今早「遙距」施政,宣佈提高樓市入場槓桿,月入6萬元或以上家庭,基本上夠能力借8成到9成入市。有分析指壓測已死,政府在經濟衰退週期剛來臨時推出此招,無疑於將香港趕入絕路,樓市泡沫總有一爆云云;亦有分析指,政府兵行險著,其實是想一炮過「綁死」專業人士,等他們乖乖供樓。
點都好,筆者跟朋友首先收到的是很多經紀的whatsapp,話樓市需求大,一定升,隨時「升到難以置信」;有內地朋友group亦熱議香港樓市動向,似是靜極思動。
壓測、負資產等等,或者都係言之尚早。
然而關鍵在於中高收入家庭(夠能力月供3萬的人),會否真的「落疊」買樓?
如果投資名家曹仁超「曹Sir」仍在生,他可能會答你,40歲前最好不要買樓,因為一但做了樓奴,你就不能隨心所慾;你亦會因為缺乏資金,失去了創業的膽量。他以騰訊馬化騰為例,馬化騰正是用首期來創立騰訊的經典例子,曹仁超認為年輕人「不要被500呎綁住青春」。
依曹Sir思路是,何苦為了一層樓,而綁住自己發圍機會?
近年大勢,中產家庭「現金為王」,在其他國家尋找投資機會已是共識。由買美股,到買泰國樓,無一不是分散風險;只要手上有錢,你就可以跳出政治紛爭移民,開始人生下半場。
早前有官員力推大灣區,連「車位王」都有發功,其實也反映出香港人是有選擇的,就算本港「上車」門檻點減都好,抵唔抵買、有無前景、自己想過什麼生活,2047年之前想點安排自己,先係實際面對的選擇題。
曹仁超仲講過:「世界上冇人可靠隨波逐流發大財,因為群眾常常犯錯。」是的,所以見到地產佬話升升升,點難忍,都要忍,就算阿爸大把錢,都真係要小心謹慎。
置業從來都係投資,尤其40歲中產,呢個時勢,你會唔會上車,綁自己30年呢?唔敢講,但有件事要提醒自己,就係成年人的青春,比年輕人的青春,一般都更加值錢同需要珍惜。
===============
精選資訊網站「中環街市」 臉書粉絲頁