嘈老闆IG｜防疫大解放誰會受惠｜曹參國

呢次新冠肺炎搞咗三年幾，真係搞到全部人都有啲抑鬱。好彩內地終於大改防疫政策，香港自不然都會跟住放鬆，而家真係做到0+0，歡迎全世界返嚟香港。但究竟乜嘢股票會係抗疫解放大贏家？咁就要先了解下人類係點樣對付病毒。

人類歷史上對抗新病毒都係要長期作戰，好似早排曹老闆去咗中西區醫學博物館嘅活動，博物館主席麥衛炳醫生親自介紹咗香港處理鼠疫嘅歷史，原來當年香港嘅鼠疫都係全球出晒名，仲要對抗咗幾十年，直至法國同日本嘅專家喺香港研究到疫苗先至解決到。今時今日全球化，新冠肺炎嘅疫苗同埋治療藥物其實已經研發得好快，而家可以話已經快過病毒變種嘅威脅，所以大解放都係正路嘅方向。

股票市場一向都係好敏感，防疫大解放呢啲咁好嘅消息，當然即刻令到唔少板塊彈起。好似零售業都頂咗好耐，莎莎國際（178）即時彈升，仲有唔少收租嘅股票，好似領展（823）、太古（019）、九倉（004）等等都似乎有排升，仲有已經升咗六、七成嘅濠賭股板塊，好似美資嘅金沙（1928）呢類賭場龍頭，驚續唔到牌嘅隱憂已經冇咗，只要內地真係放寬港澳地區嘅旅遊，真係有超級爆炸力。

順風順水嘅時候就梗係做乜生意都有錢賺，但係能夠經歷唔同風浪嘅生意先至顯示到佢嘅靭力。我就時不時去黃埔花園九號水產裏邊一間海福館酒家，唔好以為佢喺角落頭，其實喺嗰區有成十間酒樓，佢嘅出品都係完全有競爭力，就算疫情期間因為合約到期停業咗一陣，最近開返都係有好多老客人幫襯。

中菜真係好講廚房班底，海福樓嘅大廚係香格里拉酒店出嚟，老闆更加係做富豪飯堂嘅家族出身。嗰日就食咗最出名嘅炸子雞，雞肉香口嫩滑，其他廣東點心都做到高水準，雪山叉燒包更加係皮薄餡靚，面對競爭同疫情嘅壓力，仲可以保持高水準咪就可以喺防疫大解放之後受惠囉。

密切留意BossMind動向！立即CLS

FB Instagram Youtube

Powered by Mercury