雅虎香港財經 嘈老闆IG｜點樣睇得通美國通脹｜曹參國
香港聯繫滙率行咗40幾年，財政司司長波叔講咗好多次話冇需要調整，當然聯繫滙率呢啲咁重要嘅財金政策真係唔好亂咁講，有心人想舞高弄低個市當然就會流傳好多消息，政府官員口徑一致都係必須要嘅。但係喺聯繫滙率底下，香港嘅好多財金政策都俾美國牽引住，加息就係好明顯嘅例子。
美國聯儲局喺今年已經加咗7次息，估計12月都繼續有嚟，佢哋背後嘅理據就係要將美國嘅通脹降到2%，但係今年咁樣加法究竟有冇成效呢？有時睇經濟數據就好似食法國大餐一樣，你唔親身感受係好難真係知道個狀況係點。
以前講美國通脹好多時會睇CPI，但其實聯儲局喺2000年之後更加重視PCE，即係個人消費支出物價指數（Personal Consumption Expenditure Price Index，PCE Index），PCE有六個大項目，包括食品、住屋、交通運輸、醫療保健、娛樂消遣及其他等。一般認為更加能夠反映實際狀況，而最新嘅10月份PCE係接近5%，基本全年冇乜點跌，而喺2020年頭PCE係1%，即係升咗五倍都停唔到，咁又點會好似啲人咁講美國好快減息呢？
我曹老闆飛唔到去美國感受通脹，留喺香港就食吓法國大餐，喺灣仔呢間Les Saveurs私房法國菜，老闆就落埋廚房炮製，0.3mm嘅魚子醬夠晒新鮮有口感，配埋個前菜煙三文魚唔止個樣靚，上枱嘅時候加上薰煙，咬入口真係多咗重味覺感受。主菜我就揀咗魚，佢竟然可以將啲唔起眼嘅魚鱗用高溫油炸成好香口，而且完全冇腥味，係大膽嘅嘗試。更加大膽嘅係呢餐配咗中國貴州苗寨秘方釀製嘅「閃閃酒」，入口清甜又唔上頭，係驚喜嘅組合。
解決經濟問題，如果淨係用老方法，就真係冇乜驚喜。查實通貨膨脹嘅基本定義係「太多的貨幣追逐太少的商品」，美國聯儲局印咗咁多年錢，又點會唔使還呢？用加息嚟壓抑通脹，只不過係經濟學裏面其中一派嘅方法，仲有凱恩斯學派同供應學派嘅唔同招式，不過相信而家嘅美國唔會好似法國菜配糯米酒咁，有高手識得混合出招。
密切留意BossMind動向！立即CLS
Powered by Mercury
