太唔是何｜回贈 APP JamDoughnut 都會計錯數！｜400歲人瑞

日前400歲人瑞去咗Covent Garden，充滿聖誕氣氛、人頭湧湧、遊人如鯽，大家都拼命消費購物飲食拍照打卡唱歌跳舞。

年尾係英國嘅消費旺季，由10月底嘅萬聖節開始，然後到咩Thanksgiving感恩節（關英國咩事？？？）、Black Friday黑色星期五、Cyber Monday，跟住就係迎接聖誕節、新年，周圍都洋溢著叫你買嘢嘅氣氛，唔買嘢好似對唔住自己咁。

買嘢就自自然然用啲回贈網站或回贈APP去買啦，賺返啲回贈等自己消費時個心會好過啲。今日就要同大家分享一下，400歲人瑞有一次用回贈APP JamDoughnut嘅神奇體驗。

JamDoughnut嘅操作，主要係透過佢個APP去購買一啲電子禮物卡賺取回贈，例如港人熟悉嘅馬莎，又或者係一般超市如Morrisons、ASDA、Sainsbury’s咁，仲有好多其他商戶、油站、餐廳嘅電子禮物卡諸如Caffe Nero、JD、B&M等等，包羅萬有。通常會回贈幾個%到你個APP入面個Jar（佢係咁叫），個Jar儲夠一定金額就可以換現金入銀行戶口、又或者換返禮物卡入個APP入面使用。有時會做下推廣，例如早前就有馬莎6.5%回贈，即係例如你買£100嘅馬莎電子禮物卡，佢就會入返£6.5去Jar，咁你可以等到個Jar儲夠£10，再轉換成一張新的電子禮物卡（任何佢有提供嘅商戶）使用。

睇落好方便，其實都有啲麻煩位。張電子禮物卡可以多次使用，例如買咗張£100電子禮物卡，你可以多次使用直至洗晒嗰£100為止，唔需要一次過洗晒佢。但每次消費完後，個APP都唔會「自動」話俾你知張電子禮物卡剩返幾多錢；你每次都需要喺個APP度，「人手」輸入每單交易，然後才能睇到張電子禮物卡嘅最新結餘（人手輸入錯咗，個APP入面個結餘數就錯㗎啦），以及睇到人手輸入的交易紀錄。另外，用電子禮物卡消費，商戶嘅收據都會顯示嗰張電子禮物卡喺消費後嘅最新結餘，讓大家可以核對一下。

咁有一次，400歲人瑞在馬莎購物完後，就如常使用JamDoughnut嘅馬莎電子禮物卡付款，然後就拎住張馬莎收銀機彈出嚟嘅嗰張收據，輸入嗰次喺馬莎洗嘅銀碼，輸入完後：咦？點解JamDoughnut上面禮物卡嘅結餘金額，同馬莎張收據個數，唔同嘅？？？馬莎嗰張收據嘅結餘，係少過JamDoughnut APP入面個人手輸入後計出嚟嘅結餘喎。

充滿疑惑嘅400歲人瑞首先叫自己冷靜啲先，差少少啫，然後返到屋企再諗下。400歲人瑞每次購物完都會輸入消費金額，再將APP入面禮物卡結餘金額與商戶收據嘅結餘金額核對。兩個結餘金額不脗合，是400歲人瑞第一次遇到嘅衝擊。馬莎收據上嘅結餘少咗，莫非係馬莎暗中扣多咗我張電子禮物卡嘅錢？！但我之前消費完啲收據都丟晒，該如何核證呢？

如是乎，400歲人瑞就找馬莎客服（以下本身係禮貌嘅電郵對答，為求簡潔而轉換成對話方式）：

• 人瑞：喂！你好似扣多咗我錢喎

• 客服：無啲咁嘅事

• 人瑞：但你張收據上面個數，比我自己計嘅數少咗嘅？

• 客服：我睇過我哋系統內你張禮物卡嘅交易紀錄，無問題，我哋個結餘數無少到

• 人瑞：無理由，你俾你嘅交易紀錄我對下，睇下同我個交易紀錄會唔會有唔同

• 客服：俾咪俾！

400歲人瑞於是逐個交易銀碼核對，無錯吖？！每次交易嘅銀碼都脗合，但為何最後出嚟嘅結餘金額會唔同嘅呢？400歲人瑞然後再核對一下兩者每次交易完嘅結餘數，搵到其中一個位有問題了！點解JamDoughnut其中一個交易，喺消費完後，個結餘數不是減少了、而是增加了？

點解花咗£5.19後，個結餘數係由£255.95增加到£263.36？而不是減少？

400歲人瑞呆咗，點解明明洗咗錢，個結餘反而會增加？係咪有啲咩優惠俾咗我？點解有優惠都唔通知我？點解個優惠丁點咁少？同埋：馬莎是無辜的！

我怪錯咗馬莎！我有點不好意思，然後立即做個螢幕截圖，找JamDoughnut客服（以下本身係禮貌嘅電郵對答，為求簡潔而轉換成對話方式）：

• 人瑞：喂！你計錯數喎！

• 客服：睇過⋯⋯邊條數錯呀？

• 人瑞：嗰條呀！明明係減數，點解計完出嚟個數仲大咗嘅？

• 客服：咦係喎！我將個問題交咗俾development team跟進，唔好意思！

客服：咦係喎！我將個問題交咗俾development team跟進，唔好意思！

結果就係：JamDoughnut個APP原來有機會將簡單減數減錯⋯⋯

400歲人瑞事後回想，究竟呢種錯誤，係有意定係無心？陰謀論，佢可以假設客戶無咁「神心」次次都核對結餘金額，如果個數唔係大咗而係細咗，客戶會以為張禮物卡用完，然後就封存咗佢，但其實可能張禮物卡入面仲有數⋯⋯；但現時情況係，張禮物卡個數係大咗，我就以為係商戶扣多咗我錢而去淋商戶紅油。

總而言之，在這裡生活，有時啲嘢並唔係理所當然（400歲人瑞仲有幾個經歷可以share），一個APP都可以計錯簡單嘅減數。

400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯

本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。

留言、給讚、追蹤、分享，請往Facebook專頁：https://www.facebook.com/thames400