雅虎香港財經 大茶飯│兩大醫美奇葩股（青冰）
近期要在悶市中搵股票嚟寫，真係唔易，但醫療美容這個板塊，走勢強勁亦甚為有趣，兩大股份昨天都齊創新高，而有趣的是，香港醫思醫療（2138）及必瘦站（1830）都好喜歡出通告，兩間公司的投資者關係IR公司真係非常勤力呀。
美股、外匯、加密貨幣免費即時報價，自選投資組合獲取相關新聞提示。
早前青冰係寫過必瘦站，差唔多封佢為通告之王，好識玩，藉通告提高業務透明度，亦利好股價，自今年初，有關業務或股權方面的通告，共有13份，大部分業務消息通告，都係中午發出，IR公司真係食飯都唔得閒呀，近期更試過兩次在中午期間，發雙通告，以昨天為例，一個係營運數據，另一個係業務消息，至於點解要分別出兩個，實在唔清楚，但每次在中午出通告，都有助下午股價發圍，昨天再創上市新高。值得一提，在上周五的股東特別大會，要表決向老細歐陽江授出998萬股認股權，行使價係5蚊左右，股東們近期雖然見股價靚仔，心情極好，但心情好係一件事，仍以65%投票，否決了動議，感覺似同老細話，要買就落返市場買啦。
醫思醫療必瘦站愛出通告
香港醫思醫療昨天早上發通告，向新世界（017）副主席及行政總裁鄭志剛，配售2,963萬股新股，每股作價7.8元，消息亦刺激股價創上市新高。可能受到行家必瘦站感染，香港醫思醫療在發通告上變得更積極，關於業務更新及股權的通告，共有9份，不及必瘦站但都算非常勤力。
不講業務發展，兩間公司在股權結構都有幾大分別，必瘦站大股東歐陽醫生，持有逾七成股權，認真惜貨，唔會隨便批股出街，所以係無持股逾5%的其他股東；而香港醫思醫療，除了昨天批予鄭志剛，去年11月就曾向高盛、OrbiMed及私募基金GAW發可換股債券及認股權證，當中以高盛佔最多，如果悉數行使CB及認股權證，將會手持8,537萬股，是逾7%的股權，CB及認股權證的行使價分別係5.69元及6.17元，以昨天收市價8.48元相比，實在係啖啖肉呀。
其實兩隻股份都係疫市奇葩，因為美容院在過去一年裡，大部分日子都係關門，雖然近期不斷發佈靚數，但3月截數的全年業績，兩者都仍有機會發盈警，始終去年收入大受影響，如果因盈警而令股價下挫，相信是不錯的低吸機會。
青冰
http://www.fb.com/chingbing888
本欄逢周二刊出
